La Voz de Avilés
De Uiquipedia
La Voz de Avilés ye un diariu fundáu en 1908 n'Avilés. En 1996 integrose nel Grupo Correo de prensa (anguaño Vocento) a través de la cabecera xixonesa El Comercio. Dende entós, asoléyase na comarca avilesina como edición del diariu de Xixón. El so direutor ye Juan Manuel Wes López.
[editar] Hestoria
El diariu La Voz de Avilés entamó a emprentase el 26 de febreru de 1908, tres de la so fundación con Manuel González Wes. Les sos instalaciones taben afitáes na cai del Marques de Pinar del Río (anguaño La Ferrería). El periódicu caltuvo la so presencia nes cais de la ciudá de forma ininterrumpida hasta 1936, cuando l'españíu de la Guerra Civil española llevó al pieslle momentáneu de les sos instalaciones. El Boletín de Avilés, periódicu qu'empecipió a emprentase en 1937, caltuvo la presencia de la prensa pente'l conflictu. En 1942 La Voz de Avilés recuperó la so actividá embaxu la direición del fíu del fundador, Juan González Wes Dinten, nel mesmu edificiu de la cai Marqués de Pinar del Rio. Nés décades siguientes, el diariu estabilizó la so presencia nes cais con un caracter enforma localista, que-y apurrió a la par reconocencia pola parte de los avilesinos y cierta consideración d'inferioridá al empar de los diarios d'ambitu asturianu. Tres l'afitamientu n'Avilés de la empresa siderurxica Ensidesa, na década de 1950, La Voz de Avilés entamó un proceso de modernización. El resultáo d'ello foi l'apertura de les sos instalaciones n'una nave industrial n'avenida de Xixón, nes que s'abellugaben la redacción, l'alministración y los talleres. Yera l'añu 1967. Ya consolidáo, el periódicu siguió pel camín del periodismu local y comarcal (con abonda información de los conceyos de Corvera y Castrillón principalmente), y foi introduciendo dellos cambeos téunicos y de formatu. Asina, nel 1974 adoptó el tabloide envede'l formatu sábana tradicional. La Voz de Avilés llogró superar nos años siguientes la fuerte competencia del mercáu periodísticu asturianu, cola presencia nos quioscos de siete cabeceres: La Nueva España, La Voz de Asturias, El Comercio, El Noroeste, El Correo de Asturias y Asturias, diario regional, además del avilesín. Nun foi hasta la década de 1990 cuando el diariu entró n'una profunda crisis. Pa entós, La Nueva España y La Voz de Asturias ya hubieren entamao la so propia estratexa d'esperdimientu cola creación d'ediciones comarcales, lo que punxo n'una difícil situación a La Voz de Avilés, entá una empresa familiar. El Grupo Correo (anguaño Vocento), acabó por adquirir el diariu avilesín en 1996. El periódicu treslladó entós les sos instalaciones a la cai La Cámara, nel centru la ciudá, y entamó a emprentase na rotativa del diariu El Comercio, tamién integráu nel grupu vascu dende l'añu anterior. Formalmente, el periódicu avilesín adoptó el formatu y diseñu del diariu de Xixon, colo que convirtiose formalmente n'una edición d'El Comerio, pesie a que caltién la so cabecera dende entós.
