Hermanos de les Escueles Cristianes
De Uiquipedia
Hermanos de les Escueles Cristianes ye una concregación de maestros laicos, que renuncien a ser sacerdotes, y nun formen una orden relixosa tradicional. Foi creada por Xuan Bautista de la Salle en Reims (Francia) nel añu 1684.
Tabla de conteníos |
[editar] Los anicios
La idea del fundador yera la de crear escueles nes que los fíos de los artesanos y los probes aprendieren gratuitamente a lleer, escribir y aritmética y recibieren una educación cristiana. Pa ello, en collaboración con doce compañeros, entamó esa xera educativa. Al tratase d'escueles gratuites la orden buscaba benefactores que sofitaran económicamente el mantenimientu de les comunidaes d'Hermanos.
Una de les característique de la educación impartida polos Hermanos yera enseñar a los sos alumnos na so llingua materna, el francés, dexando de llau'l llatín.
L'aprobación formal del Institutu de los Hermanos de les Escueles Cristianes pola Ilesia foi concedida el 26 de xineru de 1725, mediante una Bula Papal de Benedicto XIII titulada In Apostolicae Dignitatis Solio.
[editar] La supresión y restauración del Institutu
La esistencia llegal del Institutu en Francia quedó suspendida durante la Revolución francesa ente los años 1792 y 1805, continuando un pequeñu grupu d'Hermanos esistiendo oficialmente en dellos Estaos pontificios y en Roma.
La restauración de la orden tuvo llugar baxo l'Imperiu gracies a la influencia del inspector xeneral Ambroise Rendu que-yos esixió a ellos y a otres congregaciones una titulación que los capacitara pa la enseñanza. Esta restauración dio pasu a un tiempu de xorrecimientu del Institutu a lo llargo de tol sieglu XIX, pasando de 160 Hermanos en Francia y Italia en 1810 (añu nel que los Hermanos retomen oficialmente les sos funciones educatives) a 14.631 a finales de la centuria, que finalizaría cola canonización del fundador en 1900. Nesti tiempu l'Institutu fízose presente en 35 países, n'Europa Central, Inglaterra, Estaos Uníos, Ecuador, Turquía, Túnez, Madagascar, ...
Esti espardimientu de los Hermanos llevólos a entrar en contactu con otres relixones incluyendo ente los sos alumnos a musulmanes, hindúes o budistes, que teníen qu'acudir a les clases de catecismu, aunque posteriormente eliminóse esta obligación modificando el modelu de misión de “conversión” que yera l'imperante naquelles dómines.
Ente los años 1830 y 1848 organizaron clases nocturnes p'adultos poles que pasaríen cerca de 50.000 alumnos, según fuentes del Institutu. Tamién trabayaron a lo llargo del sieglu XIX na educación y rehabilitación de los delincuentes.
[editar] El sieglu XX
Les lleis de secularización dictaes en Francia ente los años 1904 y 1912 ficieron camudar notablemente'l perfil del Institutu. Les escueles pertenecientes a les órdenes relixoses fueron obligaes a pesllar, polo que los Hermanos procuraron continuar el so apostoláu notros llugares. El Sur de Bélxica, Canadá y España fueron los principales destinos d'estos flaires.
Un fechu importante na vida de los Hermanos nesti tiempu ye la resolución de lallamada “cuestión del llatín”. Nel añu 1923 el papa Pío XI invitó al Institutu a que se impartieren materies clásiques en delles escueles, ente elles el llatín, cuya ausencia de los planes d'estudiu de los Hermanos causara problemas y dificultaes a los alumnos d'eses escueles.
La realidá de la Ilesia y del Institutu cambiaron de forma importante cola realización del Conciliu Vaticanu II en Roma ente los años 1962 y 1965, a lo que los Hermanos trataron de dar respuesta con un Capítulu Xeneral nel año 1966.
A partir d'esi añu, momentu nel que l'Institutu algamó el mayor númberu de miembros de la so historia, entamó un periodu de declive nel que un númberu importante d'Hermanos abandonen la orden.
Anguañu los Hermanos, en collaboración con seglares, tan presentes en 85 países de tol mundu. El so superior xeneral ye l'hermanu Álvaro Rodríguez Echeverría, elexíu pal cargu nel Capítulu 43 de la orden, del añu 2000.
[editar] La presencia n'Asturies
Los Hermanos de les Escueles Cristianes lleguen a Asturies nel añu 1900. El primer llugar nel que s'asitien ye en L'Arquera, nel conceyu de Llanes, de la mano del indianu Manuel Cué Fernández que fundó la Escuela del Dulce Nombre de María.
Posteriormente impartiríen enseñances en dellos llugares de les cuenques mineres del centru d'Asturies, onde fueron llamaos polos patronos (el Marqués de Comillas especialmente) de les empreses mineres pa entamar la educación de los fíos de los trabayadores. Asina vemos qu'a principios del sieglu XX van poniendo escuela en La Felguera (1902), Mieres (1903), Bustiello (1906), Turón (1919) y Caborana (1920).
Nel añu 1908 entamaron a dirixir una escuela en Colunga.
Tamién tuvieron una presencia notable en Xixón, ciudá na que siguen trabayando anguaño. A la villa llegaron nel añu 1904 de la mano d'otru indianu, Ramón Álvarez de Arriba, que iguó l'edificiu del Hotel Dindurra pa convertilu en sée de la primera escuela de los Hermanos en Xixón a la que-y pusieron el nome de S. Ramón. El fallecimientu d'Eutiquio García-Sala que dexó tolos sos bienes al párrocu de la ilesia de S. Pedro, propició la creación d'una escuela nel barriu de Cimavilla que tovía güei lleva'l nome de S. Eutiquio. Los institutos de Roces y La Calzada contaron, ente los sos enseñantes, con un buen númberu lasalianos hasta finales de los años 70, ocupando los cargos de dirección de los centros los Hermanos Fortunato y Germán respectivamente.
Durante la Revolución de 1934 seis Hermanos de la Salle y un Padre Pasionista pertenecientes a la escuela de Turón fueron asesinaos polos revolucionarios. Fueron beatificaos el 29 d'abril de 1990 y canonizaos por Xuan Pablo II el 21 de payares de 1999.
[editar] Los nomatos populares de los Hermanos
A lo llargo de los más de tres sieglos de vida de la orden, los Hermanos de la Salle fueron apodaos con diferentes nomatos. El primeru d'ellos, Frères quatre bras, dieron-yoslu en Francia nos entamos del Institutu, y fai referencia al abrigu que llevaben ensin meter los brazos poles mangues.
Tamién recibieron, pela parte de los sos detractores, al final del sieglu XIX, el nomatu de Frères ignorantins yá que'l so reclutamientu popular, nun favorecía siempre una buena instrucción de cara al so llabor na enseñanza. Esta espresión foi utilizada por Karl Marx pa dar noticia del baxu nivel y el carácter clerical de la educación na Francia burguesa.
N'Asturies y notros llugares llamáronlos Baberos debido a la llamativa señal blanca que colgaba del cuellu del so hábitu.
