Carlos Rubiera
De Uiquipedia
Carlos Rubiera ( Xixón 1956 ) ye un músicu y escritor asturianu. Miembru de Conceyu Bable, del Partíu Asturianista o de l’Academia de la Llingua Asturiana , ye una de les persones más actives del movimientu políticu y cultural asturianista.
Tabla de conteníos |
[editar] Elementos biográficos
Carlos Rubiera Tuya nació’l 2 de febreru de de 1956 en Cabueñes (Xixón) anque al pocu tiempu la familia treslladose a Garvelles, na parroquia xixonesa de Caldones, onde sigue residiendo anguaño. Tres d’estudiar Maxisteriu na Universidá d'Uviéu y Música nos conservatorios d'Uviéu y Xixón, dedicóse profesionalmente a la enseñanza. Anguaño ye profesor de Música y Asturianu nel colexu El Bosquín de L'Entregu.
Carlos Rubiera destaca pol so llabor na difusión de la llingua asturiana, non solo como cantante y escritor, sinón tamién como responsable de les clases de bable na Universidá Popular, o presentador de programes nel centru territorial de Televisión Española y na emisora Radio Mar de Xixón. Yá dende mediaos de los años setenta apaez vinculáu a les actividaes de Conceyu Bable de Xixón y collabora na sección en Alitar Asturies del diariu El Comercio. Dellos años más tarde foi ún de los primeros miembros de númberu de l’Academia de la Llingua Asturiana.
Nel ámbitu políticu, foi miembru fundador del Partíu Asturianista en 1985, y formó parte de la so Executiva Nacional hasta 1999. Representando a esti partíu, formó parte del Conseyu de Comunidaes Asturianes y del Conseyu d’Alministración de la Productora de Programes del Principáu d’Asturies
[editar] Música
A los dieciocho años compuso’l so primer cantar "Al mio primu". Per esti tiempu, diose a conocer como cantautor, y foi una de les personalidaes más relevantes del llamáu nuevu canciu astur. Dellos de los sos cantares, como "La capitana" algamaron gran popularidá y pasen a veces por tradicionales. Otres canciones destacaes son "Sardinera de Xixón" , "Llorando-y al Rhin" , "Adiós con tol corazón" o la so versión del "Viatge a Itaca" de Lluis Llach .
En 2004 creó un sellu discográficu, La Capitana, col qu’editó un llibru-discu nel que se resume la so carrera musical hasta esi momentu.
El so llabor nel tarrén de la música, amás de los nueve discos publicaos hasta agora, complétase con un estudiu sobre la tradición musical infantil publicáu nel númberu 26 de Lletres Asturianes ("Apurrimano al folklor musical d’Asturies: añaes y cantares pa neños") , l’ adaptación al asturianu, inédita pol momentu, de lieds de Brahms , Schumann o Mendelssohn ente otros.
[editar] Lliteratura
La so carrera lliteraria entamó bien ceo, cuando ganó a los quince años un concursu de monólogos n’Uviéu, cola obra titulada "La sidriquina".
En 1980 algamó'l premiu Juan Uria Riu d'ensayu cola obra La cultura asturiana, presente y perspectivas.
En, 1981 publicó'l so primer llibru de relatos, Cuentos de tres la Guerra, al que siguieron dos años más tarde una novela epistolar ambientada na Nicaragua de la revolución sandinista (Ñublu de mar y distancia ) y un relatu infantil (Vida y aventures de Musín).
Posteriormente publicó un poema satíricu, el Romance de la boroña preñada (1985), un llibru de relatos , Cuentos de bona oreya (1988) y otru de poesía , Veinte sonetos de la vida y la muerte (1999).
Foi responsable, a comuña con Ramón d'Andrés de la edición póstuma de les Obres inédites del so amigu Andrés Solar.
[editar] Discografía
- Les campanes del alba (1978)
- Pasín a pasu (1981)
- Barcu veleru (1984)
- Camín del norte (1986)
- Mariñanes (1988)
- Emigrantes (1989)
- 10 años: Antoloxía (1992)
- Viaxe al silenciu (2001, reeditáu en 2004)
- 30 años (2005)
- Canciones de Xixón (2006)
[editar] Bibliografía
[editar] Narrativa
- Cuentos de tres la Guerra. Uviéu, 1981.
- Ñublu de mar y de distancia. Uviéu, 1983
- Cuentos de bona oreya. Uviéu, 1988.
[editar] Lliteratura infantil
- Vida y aventures de Musín. Uviéu, 1983.
[editar] Poesía
- Romance de la boroña preñada. Xixón, 1983.
- Venti sonetos de la vida y la muerte. Uviéu, 1999.
[editar] Ensayu
- La cultura asturiana, presente y perspectivas. Uviéu, 1981.
[editar] Ediciones lliteraries
- Andrés Solar: Obres inédites. Aviaes y anotaes por C. Rubiera y R. d'Andrés. Uviéu, 1986.
[editar] Enllaces esternos
- Biblioteca d'autores asturianos. Contién una biografía curtia, una bibliografía (actualizada la última vez en 1999 ) y un fragmentu d'un relatu suyu.
- Revista Lliteratu. Biografía dalgo más detallada que l'anterior.
- Asina foi ... El Surdimientu. Trescripción d'una entrevista radiofónica fecha por Ignaciu Galán n'Onda peñes en payares de 2004.
