Nabata
De Biquipedia
A nabata ye una mena d'embarcazión chiqueta que consiste en un conchunto de trampos feitos con trallos de fusta, os cuals s'atableran, s'adoban, s'aplanan, se barrenan e se ligan con rametas flecsibles de matulleras (como los berducos d'a sarguera), e que tiene per funzión portiar os troncos per os ríos dende as selbas dica an que se troban as sarrarías. Ye tradizional d'os Pirinés, anque pueden trobar-sen embarcazions parexitas en belaltras partes d'o mundo.
Cuan a nabata ye gran, conta con dos remos debanters e un de coder. Si ye chiqueta, nomás que en porta un per cada cabo.
En os Pirinés de Nabarra reziben o nombre d' almadías, e en os de Cataluña, o nombre de rais.
[Editar] Istoria
As nabatas aparixoron en os tiempos en que os aczesos per tierra t'as selbas fusteras d'os cobaltos d'os mons yeran bien complicatos, estando muito más fázil de guiar-los per o río (siempre que ixo estase posible) dica bel puesto más propizio ta la suya destribuzión.
As nabatas son estatas tradizionals per tot en os Pirinés, á fin de poder guiar os troncos d'alto d'os mons enta las bals á lo sur d'os Pirinés. Per un regular os troncos se picaban, s'arrozegaban con os abríos dica las riberas d'o río, an s'amuntonaban, asperando la primabera, cuan a glera ye más gran e bi ye más fázil a guía.
Güei día contina la tradizión d'as nabatas en forma de fiesta per bels lugars d'a faxa pirinenca, como en L'Aínsa, en Burgui u en El Pont del Claverol, siempre ta de primabera. Prou conoxito ye o deszenso de nabatas A Espuña-L'Aínsa, an cada añada se desziende la Zinca en plena mayencada, en recordanza e omenache d'os antigos nabaters.
Bi ha un biero etno-botanico, baltizato con o nombre de Ruta de los Nabateros, que nabesa per os camins tradizionals que se troban d'entre Puyarruego e Escalona dica t' A Espuña.
Tamién n'esisten museus, como lo Museu de la Nabata en l'Aínsa, o Museo de la Almadía en o lugar nabarro de Burgui u lo Museu dels Raiers en o lugar catalán d'El Pont del Claverol.
