Luengas atapascas
De Biquipedia
As luengas atapascas (tamién ditas atabascas) son un grupo espardito de luengas na-dene charratas per pueblos natibos nordamericanos distanmén relazionatos, conoxitos como atapascos u indios atapascos, que abitan á l'Ueste d'America de o Norte estallatos en dos grans grupos, un á lo Norte e l'altro á lo Sur. En o lumero de luengas e de charradors, l'atapasca ye a familia más gran d'America de o Norte dimpués de l'uto-azteca. En o respeutibe á territorio, sólo que as luengas algonquinas abracan un aria más estensa.
As 24 luengas atapascas setentrionals se charran per as tierras interiors d'Alaska e de o Nordueste de Canadá (Yukón, Territorios de o Nordueste, Columbia Britanica, Alberta, Saskatchewan e Manitoba). En os Territorios de o Nordueste, cuatre luengas atapascas son ofizials: o chipewyano, o dogrib (u tli cho), o gwichin e o eslebi (u slavey).
As 7 luengas atapascas de o litoral Pazifico se charran á lo Sur d'Oregón e á lo Norte de California.
As 6 luengas atapascas meridionals, alpartatas de as setentrionals e as de o litoral, se charran en una ampla faxa de o Surueste d' Estatos Unitos e de a parti nordozidental de Mexico. Ye o grupo de as luengas apache e nabajo.
S'acostumbra á clasificar a luenga eyak e as atapascas en un mesmo grupo lingüistico clamato atapasco-eyak u atapascano-eyak. Chunto con a luenga tlingit, que se suposa relazionata con iste grupo, forman a familia de luengas na-dene.
O bocable atapasco (u atabasco) prozeden de a bersión inglesa de o nombre cree ta o Laco Atabasca.
[Editar] Clasificazión
I. Atapasco setentrional
- A. Alaskano zentral – Yukón
- B. Alaskano meridional
- C. De a Columbia Britanica zentral
- D. Kwalhioqua-Tlatskanai
- E. De o Nordueste de Canadá
- F. Sarci
- G. Tsetsaut
II. Atapasco de o litoral Pazifico
- A. Californiano
- B. D'Oregón
III. Atapasco meridional (u Apache)
- A. Apache de as planuras
- B. Apache ozidental
- C. Apache oriental
S'acostumbra á trestallar a familia de luengas atapascas en tres grans grupos: setentrionals, de o litoral Pazifico e meridionals. Manimenos, no ye claro que as luengas de o litoral e as setentrionals formen en reyalidá agrupazions completamén balidas. O estallo setentrional ye o más problematico. O modelo d'árbol familiar ta la clasificazión chenetica d'istas luengas podría estar inapropiato. O lingüista Michael Krauss se refirió á o conchunto de luengas atapascas como cohesive complex (complexo codesibo). Con tot, as luengas de o estallo meridional fan un grupet muito más omochenio e balido dende o punto de bista d'ista clasificazión.
