Bal de Buxargüelo
De Biquipedia
A Bal de Buxargüelo (en castellán Bujaruelo) ye una bal espoblata d'os Perinés situata en a probinzia de Uesca (Aragón). Muga con o Parque Nazional d'Ordesa y Mon Perdiu, chusto á lo norueste d'a bal d'Ordesa, y an naxe o río Ara.
A dentrada á la bal se fa dende a localidá de Torla, indo-se-ne ta la bal d'Ordesa, pero esbiando-se-ne en o Puen d'os Nabarros á la chucha, dende an se contina por un camín de tierra dica o fenero de San Nicolas de Buxargüelo (1.420 m.), an se i troban un cubillar, un restaurán y un camping, asinas como un polito puen romanico. Dende iste fenero bi ha un güen numero de rotas de meya y alta montaña por os mazizos de Tendenera (2.853 m), Comachibosa (3.298 m) y Monte Perdiu (3.355 m).
Por o puerto de Buxargüelo (2.270 m) (2'30 h. dende San Nicolas) se puede ir á la parti franzesa an se i troban o zirco y o salto d'augua de Gavarnie (o salto d'augua más alto d'Europa con más de 400 m. de caíta bertical), o cubillar de Sarradets (2.587 m), a Breca de Rolando y toda la cresta d'o mazizo d'o Mon Perdiu.
