Alexandra Jiménez
De Biquipedia
Alexandra Jiménez Arrechea ye una actriz aragonesa naxita en Zaragoza o 4 de chinero de 1980.
Dimpués d'emprenzipiar bien choben á estudiar ballet en o Estudio de Danza María de Ávila de Zaragoza y o Real Conservatorio Profesional de Danza de Madrid, tornando-se bailarina profesional ta os 15 años, Alexandra sofrió una lesión en o piet dreito y dezidió d'albandonar o ballet y adedicar-se á l'arte dramatico. Fazió estudios d'entrepitazión en a Escuela Superior de Artes Escénicas y Espectáculos de Madrid, encomenzando á compachinar ya en o segundo curso a suya formación con bella interbenzión en series telebisibas como Polizías, Periodistas u Compañeros.
Manimenos, o papel que la ferá conoxita ta o publico ye o d'África, a sofrita y zinica compañera de Raúl y amiga d'Eva en a serie de telebisión Los Serrano. Tamién ha partizipato en a serie Tres son multitud, como Valeria, amás de fer de colaboradora en o programa Alerta 112.
En a gran pantalla, ha treballato como Trini en a zinta de Manuel Sanabria, La fiesta. Ha partizipato en bels curtometraches: con o papel de misacha gánster en Low Bat (2002), como Isabel en Demonios de corta vista (2004), El mono de Hamlet (2004), A Mario (2004) y Anillos de Saturno (2001), que li merexió una Menzión Espezial á la Millor Actriz.
En teyatro, ha actuato prenzipalmén en: Fin del mundo, todos al tren (Alberto Millares, 2002), Los menecomos (Roberto Cerdá, 2002), Siete por siete (Fermín Cabal, 2003) y 5mujeres.com (2004).
Tamién ha feito de modelo ta las colezions Kangaroos (primabera-berano de 2005) y Bossini (agüerro-ibierno 2004-2005), en ista chunto con Alejo Sauras.
