Kruja
Us der alemannische Wikipedia, der freie Dialäkt-Enzyklopedy
Kruja (uf Albanisch au Krujë) isch ä chlyni Schdadt z'Albanie. Kruja isch d'Hauptschdadt vum Kreis Kruja. Kruja hät zirka 20.000 Ywohner un leit 20 km nordöschtlich vo Tirana ufem Wag zum Muetter Teresa Flughafe (Rinas) un Durrës. Dr name chunt vum Albanische Wort krua (Quelle).
Kruja leit am Fuess vo de Skanderbeg Bärg un isch ä induschtriels Zentrig vo Albanie. Kruja isch ufgrund vo synere Historischi Bedüdig au eis vo dä Turistischi Zentre vo Albanie. Usserdem wird Chalk brannt un d'Hügel were vo Hirte gnutzt. D'Schdadt beschtôht usenere Altschdadt mit dr Burg unem Basar unere Neuschdadt. I dr Burg gits äs Skanderbeg Museum, ä Ethnologischs Museum un ä paar andri Ruine. I dr Burg sälber wohne usserdem au ä paar Lüüt. Kruja isch lang ä arg verschmutzti Schdadt gsi, isch inzwische abr gsäubert wôre.
Kruja isch füer d'Albaner ä bsunders wichtiger Ort. Im 15te Jôhrhundert hät dr Nationalhäld Skanderbeg vo Kruja us Albanie gage d'Osmane verteidigt. 1443 hätter z'Kruja d'Befreiig vo Albanie verchündet. Füer d'näggschti 25 Jôht hät Skanderbeg vo Kruja us Albanie verteidigt. Kruja isch über 24 môl belagert wôre unter anderm au vum Sultan Murad II un schpöter vum Sultan Mehmet dr Erobrer. D'Türke hän jeds môl schwäri Verluscht erlitte obwôhl Kruja im grund gsehe ä winzigi Feschtig isch. Skanderbeg sälber isch i däre Zit nüt z'Kruja gsi sundern hät d'Türke vo dä Bärge us überfalle. Dr Albanischi Schriftschtäller Ismail Kadare beschrybt in sym Buech D'Feschtig (Kështjella) dä Champf um Kruja.
Zäh Jôhr lang nôch em Skanderbeg sym tot hät Kruja nô Wyderschtand gleischtet. Kruja hät sich schlieslich 1478 bi dr vierte Belagrig vum Mehmet müesse ergebe. D'Jungi Fraue vo Kruja hän sich dr Legende nôch ä Fälse nunter gschtürzt un d'Männer sin vo dä Osmane chrüüsigt wôre.
