Franse kookkuns
vanuit Wikipedia, die vrye ensiklopedie.
Die Franse kookkuns word as een van die mees gesofistikeerde en elegante kulinêre tradisies ter wêreld beskou. Net soos die Sjinese en Indiese kookkuns word ook die Franse deur 'n groot regionale diversiteit gekenmerk.
Die Franse kookkuns steun op 'n lang tradisie van familiêre gewoontes - met 'n verskeidenheid regionale variasies - en die "Grande Cuisine" of "Haute Cuisine", die verfynde hoofse kookkuns wat deur die Franse adel deur die eeue heen vervolmaak is.
Baie van die mees befaamde sjefs ter wêreld was meesters van die Franse kookkuns, waaronder Taillevent (Guillaume Tirel), François-Pierre de la Varenne, Marie-Antoine Carême, Auguste Escoffier of Paul Bocuse. Die Franse kookkuns en Franse kooktegnieke het daarnaas ook 'n groot invloed op feitlik alle Westerse kulinêre tradisies uitgeoefen.
Ten spyte van kits- en diepvrieskos bly vars kos en 'n smaaklike maaltyd 'n kenmerk van die nasionale identiteit van Frankryk, en die Franses bestee 'n groter deel van hul inkomste vir kos as mense in ander Europese lande. Klein kruidenierswinkels en varsproduktemarkte, wat hulle op die varsprodukte toespits, bied die geleentheid om op Sondae inkopies te doen vir 'n ete wat deur die hele gesin geniet word, terwyl ander voorraadprodukte enkele kere per maand in die hiper- en supermarkte gekoop word.
Voedsel van 'n hoë gehalte is die geheim van die Franse kookkuns. Landbouprodukte wat aan spesifieke vereistes voldoen, mag 'n rooi etiket (die Label Rouge) dra; 'n soort amptelike erkenning van hoë gehalte. Dwarsoor Frankryk is daar 'n verskeidenheid plaaslike produkte wat die Appellation d'Origine Contrôlée (AOC)-etiket dra - 'n waarborg dat die produkte in 'n spesifieke gebied en volgens die tradisionele metodes vervaardig word.
[wysig] Franse eetgewoontes
Die Franses begin die dag met 'n taamlik klein ontbyt (petit déjeuner), wat gewoonlik uit 'n groot koppie melkkoffie (café au lait), 'n croissant, 'n sny brood (tartine) of 'n stukkie baguette (Franse witbrood) met konfyt bestaan.
Die middagete (déjeuner) is al hoe groter, gewoonlik word 'n driegangmenu met wyn bedien. Beroepsmense maak gebruik van die restourante se groot aanbod van etes teen laer pryse.
Die aandete (dîner) is die daaglikse hoofmaaltyd en kan 'n vyf- of selfs aggangmenu wees wat teen agt uur met 'n aperitief (apéro) in die kroeg of tuis begin. Vonkelwyn, pastis, sjerrie of campari is die gewildste dranke wat met 'n klein voorgereg (amuse-gueule) bedien word. Die hors d'œuvre is die eerste voorgereg; 'n pastei, sop of slaai word saam met 'n glasie wyn geniet. Die tweede voorgereg (entrée of entrement) kan 'n slaai (crudité) of visgereg wees. As hoofgereg (plat de résistance) eet die Franses hoender, vleis of vis. Wyn en witbrood (pain à discretion) word altyd saam met die hoofgereg bedien. Vir nagereg is daar verskillende soorte kaas (fromage) en roomys, tert of vrugte. 'n Koppie espresso (petit noir) en Cognac of Calvados sluit die aandete af.
