Gregor Gysi
Frå Wikipedia – det frie oppslagsverket
Gregor Gysi er ein tysk sosialistisk politikar, fødd 16. januar 1948 i Berlin. Han var frå 1989 til 1993 leiar i PDS, og i 2002 var han senator i delstaten Berlin.
Gysi var ferdig utdanna jurist i 1970, og forsvarte som sjølvstendig advokat blant anna fleire kjende systemkritikarar som var tiltalte av DDR-regimet.
Gregor Gysi voks opp i ein kommunistisk funksjonærfamilie av delvis jødisk opphav. Han er gift to gonger, og har tre barn.
Frå 1967 var Gysi medlem i SED, Sozialistische Einheitspartei Deutschlands, det austtyske kommunistpartiet. I 1989 kom han fram for offentlegheita som ein av leiarane for reformrørsla i DDR. 9. desember 1989 vart han vald til leiar av SED, der dei reformvennlege no hadde fleirtal. SED vart året etter omdøypt til PDS, Partei des Demokratischen Sozialismus, under leiing av Gysi.
Frå mars til oktober 1990 var Gysi representant i det første fritt valde austtyske parlamentet, deretter frå oktober 1990 til februar 2002 representant i det alltyske parlamentet, Forbundsdagen. Frå 2001 til 2002 var han medlem i delstatsforsamlinga i Berlin.
I 2004 var Gysi mykje sjuk, og hadde fleire sjukehusopphald.
Framfor parlamentsvalet i 2005 stiller Gysi likevel opp på ny som førstekandidat for PDS, i valkretsen Treptow-Köpenick i Berlin. Han satsar der på å vinne eit tredje direktemandat for partiet, som har to slike i den noverande Forbundsdagen. Gysi går òg sterkt inn for eit venstreforbund av PDS og WASG, saman med den tidlegare SPD-leiaren Oskar Lafontaine. I samanheng med dette er det foreslått å endre namnet på partiet frå PDS til Die Linkspartei.
