Daniel Kehlmann
From Wikipedia
Daniel Kehlmann (* 13. Januar 1975 in München) is en Schriever in de düütsche Spraak.
Inholtsverteken |
[Ännern] Leben
Sien Vadder weer de Regisseur Michael Kehlmann. De Familie trock 1981 nah Wien. Dor hett he de School besöcht un later ok Philosophie un de Wetenschop vun de Literatuur studeert.
As he sien Studium to Enn harr, füng he en Dissertatschoon an öber den Begripp vun dat Erhabene bi Kant. „Dat hett nich lang duurt, dor hebb ik de liggen laten“. Dat hett ok dor an legen, „dat dat mit dat Schrieven so goot lopen dö“. In siene Böker Mahlers Zeit un Der fernste Ort leet Kehlmann glieks twee vun Helden een Promotschoon afsluten. Man he vertell denn fudder, wie de in’t Leben nich torecht kaamt.
1997 hett he sien eersten Roman rutbröcht, dat weer Beerholms Vorstellung. He schrifft in verscheeden Bläder (dor mank Süddeutsche Zeitung, FAZ, Frankfurter Rundschau) Essays un vertellt dor ok, wat he vun annere Böker holen deit.
[Ännern] Wark
In siene Böker schrifft Kehlmann nich öber sien eegen Leben. He denkt sik siene Helden ut un lett sik ok de Geschichten infallen. Dorbi probeert he dat ut, sik süms un den Leser in jem ehre Laag rin to versetten. De Minschen, öber de he schrifft, sünd up de een oder anner Aart unbannige Lüe: unbannig babenhen un iedel as in Ich und Kaminski oder unbannig klook un wiet weg vun de normalen Minschen, as in Mahlers Zeit. De Leser kann mit siene Helden meisttiets nich richtig Fründ weeren. Een fraagt sik bi’n Lesen jümmers, wannehr un up wat vun’n Aart düsse Lüe öber Kopp gaht.
De jüngst Roman vun Kehlmann is Die Vermessung der Welt. De hett sik nich bloß in Düütschland goot verkopen laten. Dat geiht um de Lebensgeschicht vun de beider Forschers Alexander von Humboldt und Carl Friedrich Gauss. Dorbi schrifft Kehlmann nich as en Biograaf, man he hett sik allerhand utdacht un tospunnen to jem ehr Leben. Dat wichtigst Thema vun düt Book is, wie twee Minschen de Welt bekieken doot, de sik anunvörsik bloß för jem ehr Fach interesseren doot un nich för de Minschen um ehr to.
Vun November 2005 af an is Kehlmann drüdde Dozent för Dichtkunst an de Fackhoochschool in Wiesbaden.
[Ännern] Böker vun Kehlmann
- Beerholms Vorstellung. Roman. Deuticke, Wien 1997. ISBN 3-216-30290-3
- Unter der Sonne. Erzählungen. Deuticke, Wien 1998. ISBN 3-216-30363-2
- Mahlers Zeit. Roman. Suhrkamp, Frankfurt 1999. ISBN 3-518-41078-4
- Der fernste Ort. Novelle. Suhrkamp, Frankfurt 2001. ISBN 3-518-41265-5
- Ich und Kaminski. Roman. Suhrkamp, Frankfurt 2003. ISBN 3-518-41395-3
- Die Vermessung der Welt. Roman. Rowohlt, Reinbek bei Hamburg 2005. ISBN 3-498-03528-2
- Wo ist Carlos Montúfar? Essays. Rowohlt, Reinbek bei Hamburg 2005. ISBN 3-499-24139-0
Up Platt is nix rutkamen vun Kehlmann.
[Ännern] Priese
- 1998 Förderpries vun den Kulturkrink bi’n Bundesverband vun de Düütsche Industrie
- 2000 Stipendium vun dat Literarisch Colloquium in Berlin
- 2001 Gastdozentur för Poetik an de Universität in Mainz
- 2003 Förderpries vun dat Amt vun den Bundskanzler in Öösterriek
- 2005 Candide Pries vun den Literarischen Vereen Minden
- 2005 Finalist för den Düütschen Bookpries: Die Vermessung der Welt
- 2006 Literatuurpries vun de Konrad-Adenauer-Stiftung
