ചട്ടമ്പിസ്വാമികള്‍
വിക്കിപീഡിയ, ഒരു സ്വതന്ത്ര വിജ്ഞാനകോശം.
ചട്ടമ്പിസ്വാമികള്‍ അഥവാ പരമഭട്ടാചാര്യ വിദ്യാധിരാജ ചട്ടമ്പിസ്വാമികള്‍ (ഓഗസ്റ്റ് 25, 1853 - മേയ് 5, 1924)കേരളത്തിന്റെ സാമൂഹിക നവോത്ഥാനത്തില്‍ നിര്‍ണ്ണായക പങ്കുവഹിച്ച ആത്മീയാചാര്യനായിരുന്നു. ഹിന്ദുമതത്തിലെ ബ്രാഹ്മണാധിപത്യത്തെ ചോദ്യം ചെയ്താണ് അദ്ദേഹം പൊതുരംഗത്തു ശ്രദ്ധേയനായത്. വര്‍ണ്ണാശ്രമ വ്യവസ്ഥയുടെ നിഷേധം, സ്ത്രീപുരുഷ സമത്വവാദം, സാര്‍വത്രിക വിദ്യാഭ്യാസത്തിനുള്ള ആഹ്വാനം എന്നിങ്ങനെ അതുവരെ കേരളീയ സമൂഹം ചര്‍ച്ചചെയ്യാത്ത വിഷയങ്ങള്‍ ചട്ടമ്പിസ്വാമികള്‍ പൊതുവേദികളില്‍ അവതരിപ്പിച്ചു. മതപുരാണങ്ങളെയും ആചാരങ്ങളെയും യുക്തിയുടെ വെളിച്ചത്തില്‍ സമീപിക്കുകയായിരുന്നു അദ്ദേഹത്തിന്റെ പ്രവര്‍ത്തനശൈലി.
[തിരുത്തുക] ജനനം, ബാല്യകാലം
തിരുവനന്തപുരത്തിനടുത്തുള്ള കൊല്ലൂര്‍ എന്ന ഗ്രാമത്തിലെ ഒരു ദരിദ്ര കുടുംബത്തില്‍ 1853 ഓഗസ്റ്റ് 25നാണ് സ്വാമികള്‍ ജനിച്ചത്. അച്ഛന്‍ താമരശേരി വാസുദേവ ശര്‍മ്മ, അമ്മ നങ്ങേമ്മപ്പിള്ളി. അയ്യപ്പന്‍ എന്നായിരുന്നു യഥാര്‍ത്ഥ പേരെങ്കിലും കുഞ്ഞനെന്ന ഓമനപ്പേരിലാണ് കുട്ടിക്കാലത്ത് അറിയപ്പെട്ടിരുന്നത്.
ദാരിദ്ര്യം നിറഞ്ഞ ചുറ്റുപാടുകള്‍ പ്രാഥമിക വിദ്യാഭ്യാസം ആര്‍ജ്ജിക്കുന്നതിനു തടസമായിവന്നു. എന്നാല്‍ സമപ്രായക്കാര്‍ പാഠശാലകളില്‍ നിന്നും മടങ്ങിയെത്തുമ്പോള്‍ അവരുടെ കൈവശമുള്ള ഓലക്കെട്ടുകള്‍ നോക്കി കുഞ്ഞന്‍ അറിവു സമ്പാദിച്ചിരുന്നുവെന്ന് അദ്ദേഹത്തിന്റെ ജീവചരിത്രകാരന്മാര്‍ രേഖപ്പെടുത്തുന്നു. ഇപ്രകാരം മലയാളം അക്ഷരമാലയും തമിഴും മലയാളവും കൂട്ടിവായിക്കാനും പഠിച്ചു. കുറച്ചുകാലത്തിനുശേഷം വടിവീശ്വരം വേലുപ്പിള്ള ആശാനില്‍നിന്നു കണക്കും വായനയും പഠിച്ചു. വീടിനു സമീപമുള്ള കൊല്ലൂര്‍ മഠത്തിലെ ശാസ്ത്രികള്‍ കുഞ്ഞനു പഠിക്കാനുള്ള താല്പര്യം തിരിച്ചറിഞ്ഞ് അമരകോശം, സിദ്ധരൂപം, ലഘുകാവ്യങ്ങള്‍ എന്നിവ അഭ്യസിപ്പിച്ചു.
പതിനഞ്ചു വയസുള്ളപ്പോള്‍ പേട്ടയില്‍ രാമന്‍പിള്ള ആശാന്‍ എന്ന പണ്ഡിതന്റെ പാഠശാലയില്‍ ചേര്‍ന്നു. ആശാന്‍ കുഞ്ഞനെ പാഠശാലയിലെ ചട്ടമ്പിയായി നിയമിച്ചു. 'ചട്ടമ്പി' എന്നാല്‍ ചട്ടങ്ങളെ നിയന്ത്രിക്കുന്നവന്‍-നേതാവ് എന്നേ അര്‍ത്ഥമുള്ളൂ. ഇതോടെ കുഞ്ഞന്‍പിള്ള ചട്ടമ്പി എന്നറിയപ്പെടാന്‍ തുടങ്ങി. പിന്നീട് മുതിര്‍ന്നപ്പോഴും 'ചട്ടമ്പി' എന്ന സ്ഥാനപ്പേര്‍ പേരിനൊപ്പം കൂടി.
-
ഈ താള്‍ പൂര്‍ണ്ണമല്ല, ഇതു പൂര്‍ണ്ണമാക്കുവാന്‍ വിക്കിപീഡിയ സംരംഭത്തില്‍ പങ്കാളിയാവുക (ശ്രദ്ധിക്കുക: നവാഗതര്‍ക്ക് സ്വാഗതം, സഹായക താളുകള്‍)
