Харви Пекар
Од Википедија, слободна енциклопедија
Харви Пекар (англиски: Harvey Pekar, роден на 8 октомври, 1939 во Кливленд, Охајо) е американски писател на андерграунд стрипови. Неговото пријателство со Роберт Крамб довело до создавањето на серијалот на стрипови: Американски сјај (American Splendor) што подоцна е адаптирано во долгометражен филм. Крамб и Пекар станале пријатели поради нивната љубов кон џез плочите, и Крамб бил првиот уметник кој го илустрирал Американски сјај. Овој стрип го опишува секојдневниот живот во старите соседства на Пекаровиот роден град, Кливленд, каде Пекар работел (преку целиот живот, дури и откога станал славен), како службеник во една голема болница. Подоцна серијалот ќе биде продолжен од повеќе цртачи, од кои некои денеска се сметаат за култни.
Во доцните 80ти, успехот на стриповите на Пекар довел до осум појавувања во Шоуто на Дејвид Летерман. Сепак, неговиот предизвикувачки дух и отворената критика во живо на General Electric (што го поседувал NBC) довел до забрана за негово гостување сè до раните 90ти.
Во 2003 беше издадена филмска адаптација на Американски сјај која е добро прифатена од критиката. Пол Џијамати е во улогата на Пекар, а и самиот Пекар се појавува во филмот. Пекар ги напиша ефектите од филмот во Американски сјај: Нашата филмска година (American Splendor: Our Movie Year).
На 5 октомври 2005, брендот на DC Comics, Vertigo, го публикувал Пекаровото автобиографско дело Малодушник (The Quitter), нацртан од Дин Хашпил. Книгата се концентрирала на раните години на Пекар`, и било создадено делумно како награда за Хашпил поради неговата улога во запознавањето на Пекар со продуцентите кои го направија филмот Американски сјај.
Во 2006, Пекар ќе издаде петделен минисеријал Американски сјај преку Vertigo [1]. Исто така, тој во меѓувреме ја издал и првата не-автобиографска книга за Ballantine/Random House, Его и гордост: Приказната за Мајкл Малис ( Ego & Hubris: The Michael Malice Story), сега основачки уредник на OverheardinNY.com. Исто така, во 2006 година треба да излезе стрипот Македонија, соработка на Пекар со студенката Хедер Роберсон и уметникот Ед Пискор.
Освен тоа што го пишува серијалот Американски сјај, Пекар е плоден џез и книжевен критичар. Исто така, има добиено награди за есеи емитувани на јавно радио.
Од 1960 до 1972 година бил оженет со Карен Дилејни, писателка и едукатор, која моментално живее во Чикаго. Третата жена на Пекар е писателката Џојс Брабнер, со која соработувал на Нашата година на ракот(Our Cancer Year), стрип-автобиографија за неговата борба со лимфомата; со ова дело ќе ја добие наградата Харви за Најдобар стрип од оригинално дело. Исто така, ја има добиено Американската книжевна награда за колекцијата: Антологијата на новиот американски сјај (The New American Splendor Anthology).
