ბორჯომის რაიონი
ვიკიპედიიდან
ბორჯომის რაიონი - ადმინისტრაციული რაიონი სამცხე-ჯავახეთის მხარეში. ისტორიული დასახელებაა თორი. რაიონის ტერიტორია 1917 წლამდე ტფილისის გუბერნიის გორის მაზრაში შედიოდა, 1917-30 წლებში - გორის ოლქში, 1930 წლიდან ცალკე რაიონია, 1963-66 წლებში ჩართული იყო ხაშურის რაიონის შემადგენლობაში.
სექციების სია |
[რედაქტირება] ბუნება
რაიონის ტერიტორია მოიცავს მცირე კავკასიონის ნაწილს, თრიალეთის ქედის დასავლეთ და მესხეთის ქედის აღმოსავლეთ დაბოლოებებს, უჭირავს ე.წ. თორის ქვაბული და ბორჯომის ხეობა. ტერიტორია - 1189 კვ.კმ., მათ შორის სასოფლო-სამეურნეო სავარგულებს უკავია 440 კვ.კმ. რაიონის ტერიტორიაზე მიედინება მდინარეები მტკვარი, ბორჯომულა, გუჯარეთისწყალი. რაიონში ბევრი ტბაა: ტაბაწყური, კახისი, წეროს ტბა და სხვა. მთავარი წიაღისეული სიმდიდრეა ბორჯომის ფართოდ ცნობილი მინერალური სამკურნალო წყალი. აქ არის ასევე სამშენებლო ქვები - ანდეზიტი, ბაზალტი და პემზა.
[რედაქტირება] მოსახლეობა
მოსახლეობის რიცხოვნობა - 32 ათასი კაცი; სიმჭიდროვე - 27 კაცი კვ.კმ-ზე. რაიონში 42 დასახლებული პუნქტია: 1 ქალაქი, 4 დაბა და 37 სოფელი.
[რედაქტირება] მმართველობა
რაიონის ადგილობრივი თვითმმართველობის უმაღლესი ორგანოა რაიონის საკრებულო, აღმასრულებელი ორგანო - რაიონის გამგეობა. მმართველობის ადმინისტრაციული ერთეულებია:
- ქალაქის საკრებულო - 1: ბორჯომი;
- დაბის საკრებულო - 3: ახალდაბა, ბაკურიანი, წაღვერი;
- თემის საკრებულო - 6: ბალანთის, დვირის, ტაბაწყურის, ტაძრისის, ტბის, ყვიბისის;
- სოფლის საკრებულო - 1: ციხისჯვარი.
[რედაქტირება] ეკონომიკა
მრეწველობის წამყვანი დარგია მინერალური წყლების ჩამოსხმა, არის ადგილობრივი მნიშვნელობის სხვა საწარმოები. სოფლის მეურნეობაში მთავარია მეხილეობა და მეცხოველეობა. ბორჯომის რაიონი ცნობილია თავისი საკურორტო მეურნეობით, სამთო-კლიმატური და ბალნეოლოგიური კურორტებით: ბორჯომი, წაღვერი, ცემი, ტბა, ლიბანი, ციხისჯვარი, ბაკურიანი.
[რედაქტირება] კულტურა
რაიონში 33 სახელმწიფო ზოგადსაგანმანათლებლო სკოლაა, 3 საშუალო პროფესიული სასწავლებელი, 35 ბიბლიოთეკა, 1 თეატრი (სახალხო თეატრი 1959 წლიდან) და 1 მუზეუმი (მხარეთმცოდნეობის).
[რედაქტირება] ღირშესანიშნაობანი
რაიონის ტერიტორიაზე ძველი ქართული ხუროთმოძღვრების მრავალი ძეგლია: ნეძვის ბაზილიკა (IX ს.), სამონასტრო ანსამბლები ტიმოთესუბანში, ლიკანში და ჩითახევში, ციხესიმაგრეთა ნანგრევები - გოგიას ციხე, პეტრეს ციხე და სხვა.
| სამცხე-ჯავახეთის მხარე | |
| ადიგენის რაიონი | ასპინძის რაიონი | ახალქალაქის რაიონი | ახალციხის რაიონი | ბორჯომის რაიონი | ნინოწმინდის რაიონი | |
