Mozilla Firefox
De Vichipedie, la enciclopedie libare dute in marilenghe.
Mozilla Firefox (che al vûl par inglês Bolp di fûc) al è un sgarfadôr (browser) che al permet di navigâ su la rêt Internet. Al è disponibil par plui sistemis operatîfs e al è svilupât come program a risultive vierte de Mozilla Foundation. La version 1.0, daspò scuasit doi agns di svilup, e je stade publicade ai 9 di Novembar 2004. La version 1.5, daspò un altri an di disvilup, e je stade dade fûr ai 29 di Novembar 2005. La version plui resinte e je la 2.0, vignude fûr ai 25 di Otubar 2006.
Il non origjinâl al jere Phoenix (fenîs, par inglês), simbul de gnove nassite de cinise di Netscape. Ma chest non al dovè jessi gambiât parcè che al jere za doprât da Phoenix Technologies, une dite che a fâs BIOS. Il non sielzût al fo Firebird, lassat ancje daspò di bande parcè che in conflit cun la base di dâts Firebird SQL.
Indis |
[cambie] Carateristichis principâls
Firefox, a diference de Mozilla Suite, il precedent prodot de Mozilla Foundation, nol è un côl di programs, ma al è dome un sgarfadôr; se nus covente un program par lei la pueste eletroniche e i grups di discussion, o puedin doprâ Mozilla Thunderbird, inmò pes funzions di calendari al è Mozilla Sunbird. I obietîfs principâi a son la facilitât di ûs, la stabilitât, il rispiet dai standarts web, la sigurece, la velocitât, cence rindilu masse pesant. Al è ancje disponibil par plui sistemis operatîfs (Microsoft Windows, GNU/Linux, Mac OS, OS/2 e Solaris a son i principâi) e in tantis lenghis, includût dai prins dal 2005 ancje il furlan.
De publicazion de version 1.0, Firefox e à vût une grande difusion e ai 19 di Otubar 2005 a si è rivâts a 100 milions di discjamadis, cun scuasit 50 milions in sîs mês; ai 4 di Avost 2006 lis discjamadis a àn tocjât la cuote di 200 milions. La percentuâl di ûs di Firefox e je oramai parsore il 20% in Europe, cun pontis di scuasit 40% in Slovenie. Chest al à un pôc spaurît la Microsoft che e à decidût di disvilupâ une gnove version dal so sgarfadôr, Internet Explorer, che nol vignive inzornât di un pâr di agns.
[cambie] Estensions
Une des carateristichis plui famosis di Firefox e je che chê di podê slargjâ lis funzions dal program par mieç di tocs che a zontin gnovis pussibilitâts e scurtin ciertis azions dai utents. Par esempli si pues viodi diretementri intal sgarfadôr il timp in dut al mont, o viodi lis gnovis cjapadis dai sîts di informazions plui cognossûts, o ancjemò vê une note se a rivin gnûfs messaçs di pueste eletroniche inte nestre casele.
[cambie] Lengutis
Altre funzion une vore cognossude e doprade dai utents e je che di podê vierzi jentri di un barcon dal sgarfadôr plui istancis, segnaladis di une lengute in alt sot de bande dai imprescj. Chest al permet di no vê masse confusion inte bande des aplicazions e di podê sierâ dutis lis pagjinis intun colp.
