Lâcs di Fusine
De Vichipedie, la enciclopedie libare dute in marilenghe.
I doi lâcs di Fusine (todesc Weissenfelser Seen), che a son comprindûts intal territori dal Parc naturâl dai lâcs di Fusine a si cjatin a un dîs chilometris di Tarvis, dongje il confin cu la Slovenie; chescj doi lâcs (clamâts un Superiôr, chel altri Inferiôr) a son intune conche cun ator un imponent cercli di monts, di cui il plui visibil al è il Mangart.
La origjine dai lâcs e je glaçâl, ven a stâi che a si son formâts dulà che a son restâts i rescj morenics che cui agns a àn blocât il deflùs des aghis. Il lâc superiôr si cjate a 929m di altitudin, cun mancul di 10 metris di profonditât e alimentât dome dai events atmosferics (ploie, nêf e v.i.); il lâc Inferiôr, a 924 m di altitudin, al rive a 25 metris di profonditât e al è alimentât sot tiere di aghe che ven dal lâc Superiôr; chest lâc al à ancje un emissari, il Riul dal Lâc. Dute la zone ator dai lâcs e à une vivarose vegjetazion e faune, che le àn fate declarà aree protezude tal 1971.