Wish You Were Here
Wikipedia(e)tik
Pink Floyd taldearen bederatzigarren diskoa, 1975.urtean sortua. "The Dark Side of the Moon" disko arrakastatsuaren ondoren (1973) bi urte pasatu ziren "Wish you were here" kaleratu arte, taldeak produktu berria tentuz zaindu nahi baitzuen. Emaitza, hala ere, aurreko lanarena baino apalagoa izan zen kritikoen ustez, "The Dark Side of the Moon" gainditu nahi izatea ez baitzen erronka samurra.
Diskoa taldearen partaide ohiari, Syd Barrett-i, egindako omenaldia omen da. "Shine on you Crazy Diamond"-en hitzek, oso kriptiko eta ilunak, Barrett-en buruko osasun arazoak gogoratzen omen dituzte; "Wish You Were Here"-k, berriz, lagun zaharraren hutsunea gogora ekartzen du. Zazpi urte pasatu dira Barrett-ek taldea utzi zuenetik (edo utzierazi zutenetik), baina taldekideengan utzitako eragina bizirik zirauen, antza.
"Wish You Were Were"-n Pink Floyd-ek perfekzioa bilatzen du, aurreko lana ("The Dark Side of the Moon") hobetu nahian. Horretarako, lan berriak toki gutxi uzten dio inprobisazioari, diskoan dena baita oso neurtua. Soinua inoiz baino garbiagoa da, inoiz baino gardenagoa. Diskoak sortzen duen atmosfera lasaigarria da guztiz, "rock kosmikoaren" gailurra. Horrek ez du esan nahi, ordea, gai batzutan rock gogorragoa agertzen ez denik ("Welcome to the Machine"-n eta "Have a Cigar"-en, esate baterako).
"Shine on you Crazy Diamond" da diskoaren pieza nagusia, 9 zatitan banandua. Taldeko lana da, Nick Mason-en ekarpena apalagoa bada ere. Lehenengo hiru zatitan soinu lasaigarria da nagusi; 6. eta 7. zatiek, berriz, erritmo aldaketa nabarmenak dituzte, ondo landuak eta gauzatuak klimax-era iritsi arte.
Diskoak salmenta arrakasta lortu zuen erraz, kaleratu bezain laster lehenengo postura heldu baitzen Erresuma Batuko zein Estatu Batuetako disko zerrendetan. Kaleratu eta hilabete batean, milioi bat ale salduak ziren. Arrakasta azkar honen erantzulea, dudarik gabe, aurreko lana izan zen ("The Dark Side of the Moon"), horrek eragin baitzuen lan berriarekiko ikusmin itzela.
