Sutherland
vanuit Wikipedia, die vrye ensiklopedie.
Sutherland is 'n dorp in die Karoo-hoogland van die provinsie Noord-Kaap (Suid-Afrika). Dit staan bekend as die sentrum van die sterrekunde in Afrika, maar ook as die koudste dorp in Suid-Afrika met sneeuval en uiterste temperature van -6,1 °C in die winter.
Danksy sy afgeleë en droë ligging 1 458 meter bo seevlak staan dit bekend vir sy nagtelike hemel, wat tot die klaarste en donkerste ter wêreld behoort en sodoende uiters geskik is vir sterrekundige navorsing.
Die Suid-Afrikaanse Sterrewag, wat in 1972 sowat veertien kilometer buite die dorp geopen is, was destyds een van die grootste in die suidelike halfrond. Sutherland huisves vandag ook die Groot Suider-Afrikaanse Teleskoop (Southern African Large Telescope, SALT), die grootste enkele teleskoop in die suidelike halfrond.
