Arabisch
Van Wikipedia
- Dit artikel is gesjreve in 't Mestreechs. 't Weurt gewaardeerd óm in dit artikel woe meugelik 't Mestreechs aan te hawte.
't Arabisch is de cultuurtaol vaan d'n Islam en de taol die vaan Marokko tot in Irak (in de Arabische len dös) door 225 miljoen minse gesproke weurt. Daomèt is 't de veerde wereldtaol. Väöl aander minse kinne de taol verstoon. Veur alle moslims (zuug Islam) heet de taol 'n liturgische functie. 't Arabisch dialek vaan Marokko is de mojertaol vaan oongeveer 40% vaan de Marokkaanse immigrante in Nederland; de rès sprek Berbers (wienie me eve negeert tot väöl joongere oonderein Hollands praote). 't Arabisch weurt gesjreve in 't Arabisch sjrif.
[bewirk] Variante
De taol die me in gezètte en aander media gebroek weurt MSA (Modern Staanderd Arabisch) geneump. In groete liene is dat nog zjus de taol boe-in de Qor'ân gesjreven is, 't Arabisch vaan de zevende ieuw dös. De spreektaol vaan de volk (of 't euvergroete deil daovaan) wiek dao hendeg vaan aof. Zoe zien de naomvalle d'roet verdwene, tewijl 't Klassiek Arabisch 'rs drei heet (nominatief, genitief, accusatief). De dialekte vaan Marokko en 't Midden-Ooste ligke zoe wied oeterein tot ze taolkundeg twie versjèllende taole vörme - polletiek ligk dees kwestie evels geveuleg en daorum prefereert me de tèrm dialek. In informeel gesproeke media weure de dialekte wel gebroek, zoe weurt 't Egyptisch daankzie de Egyptische filmindustrie euveral in de Arabische wereld verstoon. 't Maltees weurt allewijl neet es Arabisch dialek, meh es aparte taol gezeen.
[bewirk] Arabische wäörd in 't Limburgs
'n Aontal wäörd, boe-oonder väöl alledaagse, zien in de Limburgse taol gekoume. 't Geit um wäörd wie admiraal, alcohol, algebra, cijfer, fakir, kemeel, koffie, masker, metras, papegaai, soda en sókker.
