Galileo Galilei
De Uiquipedia
Galileo Galilei, o Galileu (Pisa, 15 de febreru de 1564 - Arcetri, 8 de xineru de 1642) foi un físicu, astrónomu y filósofu italianu consideráu, xunta Newton, como'l padre de la física. Yera fíu de Vincenzo Galilei y Giulia degli Ammannati.
En 1581, Galileu entra na universidá de Pisa pa estudiar medicina, pero acaba interesándose nes matemátiques. Amuesa qu'Aristóteles taba enquivocáu al suponer que la velocidá de caída de los obxetos ye proporcional al so pesu. Pa demostralo, midió'l tiempu de caída de pesos llanzaos dende la torre inclinada de Pisa. Descubre l'isocronismu del péndulu observando les oscilaciones d'una llámpara na catedral. En 1592, Galileu entama como profesor de matemátiques na universidá de Padua, au remanez 18 años. Construi un aparatu de medición, el sextante, trabaya nuna desplicación de les marees basada nes teories copernicanes, y escribe un tratáu de mecánica amosando que les máquines nun creen enerxía, transfórmenla.
En 1604, a causa de l'apaición d'una nova, Galileu caltién un alderique colos filósofos que sosteníen la tesis d'Aristóteles sobre la inmutabilidá del firmamentu. En 1609 descubriría el telescopiu por parte de l'holandés Hans Lippershey y decide construise unu, estremáu del holandés y aplícalo a la observación del cielu. Acabante 1609, Galileu tenía un telescopiu de 20 aumentos que-y permitía estudiar los cráteres de la Lluna y distinguir les estrelles de la Via Láctea. Descubre cuatro satélites de Xúpiter (satélites galileanos), lo que-y sedrá disputáo por Simon Marius. Asoleya los sos descubrimientos en 1610, cosa que provoca pergrandes controversies al nun cuntar el restu científicos con telescopios pa confirmar les observaciones de so.
El gran duque de Toscana, Cosimo II (al que-y dedicara'l so llibru Sidereus Nuncius, El Mensaxeru de les Estrelles) nómalu matemáticu de la corte de Florencia, lo que-y permite dedicar tol so tiempu a la investigación. Galileu continúa faciendo valoratibles descubrimientos científicos, observando les fases de Venus, que, xunta los satélites de Xúpiter, convéncenlu de les enquivocaciones de Copérnicu. La Ilesia refuga darréu les posiciones de Galileu, pero ésti apela a la llibertá d'investigación con una carta a la duquesa Cristina en 1615. Respuenden-y dende el Santu Oficiu de Roma cola espublización d'un edictu escontra Copérnicu en 1616.
En 1623, el Papa Urbanu VIII autoriza-y a escribir un llibru nel que compara les sistemes de Ptolemeu y Copérnicu. Por embargu, Galileu ye xulgáu en Roma pola Inquisición pola mor de la difusión de les teoríes de Copérnicu en 1632. Cuenta la leyenda que al final del cónclave que lu condergó Galileo dixo "Eppur si muove", o seya, que la Tierra muévese, a pesar de lo que dixeren los xueces eclesiásticos. El xuiciu nun foi anuláu pola Ilesia Católica hasta l'añu 1992.
La conderga de Galileu foi conmutada por un arrestu domiciliariu en Arcetri na redolada de Florencia. Ellí fina les sos investigaciones sobro'l movimientu y la resistencia de los materiales. En 1638 espubliza los Discursos y demostraciones matemátiques sobre les dos nueves ciencies. Esti trabayu marca l'aniciu del estudiu de la dinámica.
[editar] Enllaces esternos
- Biografía básica de Galileo Galilei (en castellanu)
- Biografía ampliada (n'inglés).
- El proyectu Galileo (n'inglés).
