Haute-Normandie

vanuit Wikipedia, die vrye ensiklopedie.

Haute-Normandie

Départements	Eure (27) Seine-Maritime (76)
Prefektuur	Rouen
Bevolking	1 780 192 inw. (1999)
Bevolkingsdigtheid	145 inw./vk km
Oppervlakte	12 317 vk km
Arrondissemente	15
Kantons	6
Munisipaliteite	1 434
President van Gewestelike Raad	Alain Le Vern (PS)

Die Brotonne-brug in Seine-Maritime

Haute-Normandie ("Hoog-Normandië") is een van die Franse geweste, wat in die jaar 1956 as administratiewe eenhede gevorm is, en bevat twee départements: Seine-Maritime en Eure. Haute-Normandie beslaan die oostelike deel van die historiese provinsie Normandië, met 'n oppervlak van 12 317 vierkante kilometer en sowat 1,8 miljoen inwoners (1999).

[wysig] Geskiedenis

Sien hoofartikel : Normandië

Normandië ontwikkel ná die Eerste Wêreldoorlog tot een van die sentrums van die Franse papier- en petrochemiese bedryf. Die landing van die gealliëerde magte op 6 Junie 1944 maak tydens die Tweede Wêreldoorlog 'n einde aan die Duitse besetting, maar die gewes behoort tot die Franse gebiede wat die swaarste getref is deur die oorlogshandelinge.

Ná die Tweede Wêreldoorlog groei die plaaslike ekonomie vinnig, en baie ondernemings uit die metropolitaanse gebied van Parys kom hulle in Haute-Normandie vestig.

[wysig] Geografie

Marais Vernier, Eure

Die belangrikste landskappe in die département Seine-Maritime is die Alabasterkus (Frans: Côte d'Alabâtre) met sy kenmerkende, 200 miljoen jaar oue rotsformasies, wat bo-oor die strande verrys en tot by 110 meter loodreg grond toe val, en die Seinevallei, 'n landskap wat deur krytrotse en bebosde heuwels oorheers word. Die Seine het oor 'n tydperk van 60 000 jaar 'n soort amfiteater met 'n oppervlak van 30 vierkante kilometer dwarsdeur die heuwels gegrawe. Naby Le Havre, die tweede grootste seehawe in Frankryk na Marseille, mond die Seine in die Engelse Kanaal uit.

Eure spog met 'n groot aantal tuine, kloosters, kerke en ander besienswaardighede in sy uitgestrekte weilande, wat tussen die Seinemonding in die weste, Gisors in die ooste, die suide van die Normandiese hoofstad Rouen en die kunstenaarsdorp Verneuil-sur-Avre lê.

[wysig] Ekonomie

Haute-Normandie is 'n hoogs geïndustrialiseerde gewes. Die plaaslike nywerhede bied in 2001 werksgeleenthede vir meer as 142 000 mense en vervaardig sestig persent van die Franse smeerolie-produksie, vyftig persent van sy plastiek en dertig persent van sy motors. Dit is die belangrikste produsent van linne, die vierde belangrikste gewes ten opsigte van buitelandse handelsbetrekkinge en die sesde belangrikste ten opsigte van navorsing.

[wysig] Demografie

36,5 persent van die bevolking is jonger as 25 jaar, wat van Haute-Normandie die jongste gewes in Frankryk maak. Met twee persent van die totale nasionale oppervlak verteenwoordig Haute-Normandie met sy 1,74 miljoen inwoners 3 persent van die totale nasionale bevolking.

[wysig] Besienswaardighede

Die Eure, naamgewer van die département

Glasvensters in die katedraal van Rouen

Haute-Normandie en sy hoofstad Rouen beskik oor die grootste digtheid museums in Frankryk. Digby die plek, waar Johanna van Arkel deur die Engelse op die brandstapel tereggestel is - die ou markplein van Rouen -, behandel die Johanna-van-Arkel-museum haar geskiedenis.

Die département Seine-Maritime lok toeriste met 'n aantal historiese en fynproewerroetes soos die Ivoorroete, Speseryeroete, Roete van die Abdye, Kaasroete en die Appel- en Siderroete.

Die Route des Maisons d'Écrivains in Eure loop langs die huise van 'n aantal bekende Franse skrywers. In die Château de Vascœuil, 'n kasteel uit die 14de eeu, het die Franse historikus Jules Michelet sy hoofwerk, die Histoire de France ("Die geskiedenis van Frankryk") in 16 boekdele, voltooi.

[wysig] Bronne

Michel de Boüard: Histoire de la Normandie. Toulouse: Privat, 2001 ; ISBN 2-7089-1707-2

[wysig] Eksterne skakels

Die administratiewe gebiede van Frankryk
Elsas \| Aquitaine \| Auvergne \| Bourgogne \| Bretagne \| Centre \| Champagne-Ardenne \| Korsika \| Franche-Comté \| Île-de-France \| Languedoc-Roussillon \| Limousin \| Lorraine \| Midi-Pyrénées \| Nord-Pas-de-Calais \| Basse-Normandie \| Haute-Normandie \| Pays-de-la-Loire \| Picardie \| Poitou-Charentes \| Provence-Alpes-Côte d'Azur \| Rhône-Alpes
Oorsese gebiede:
Frans-Guayana \| Guadeloupe \| Martinique \| Réunion