Istanbul

Diwar Wikipedia, an holloueziadur digor

Ar pennad-mañ n'eo ket peurechu c'hoazh ; ma fell deoc'h labourat warnañ deuit da welout ha lakait hoc'h ali e pajenn ar gaozeadenn.

Brasañ kêr Turkia eo Istanbul ha, goude bezañ bet ar gêr-benn bolitikel eus an impalaeriezh otoman e-doug pemp c'hantved, ar gêr-benn armerzhel eo hep mar pa' eus 13 milion annezad en he zolpad-kêrioù. Ur c'hroazhent staliet war div ribl strizh-mor ar Bosfor eo, eus ar re treizhet pa weler un gourhent o vont eus Reter Europa da Su Azia hag un hent-houarn ivez, an daou o treizh a-us un tremen war vor gant miliadoù a listri-samm (meur a eoulestr en o zouezh) o kas-degas marc'hadourezhioù etre broioù ar Mor du ha broioù ar Mor Kreizdouar ha pelloc'h c'hoazh. Eus ar galleg o trevezañ ar gresianeg εις τήν Πόλι(ν), Eis tin Poli(n), = e tu ar gêr) e teufe anv Istanbul (azazaet d'an turkeg), un anv dibabet gant an impalaer ottoman trec'hour, Mahmut II pa aloubas Kergustentin e 1453. Lod a lavar e teufe an anv eus Konstantinopoulis berraet. Koulskoude e veze graet gant Stamboul/Istanbul nemet evit ar gêr gozh. E 1930 e e voe astennet an anv d'an tolpad-kêrioù.

[kemmañ] Istor

[kemmañ] Bizañs

Evit an amzerioù a-raok 1453 ez eus da sellet ouzh istor Kergustentin hag hini an impalaeriezh roman ar Reter hag evit ar mareoù turk goude 1453 ouzh ar pennadoù Impalaeriezh otoman ha Turkia.

Bizañs a zo bet diazezet gant trevadennourien gresian deuet eus Megara e 667 Kent JK, ar re-se konduet gant an tiern Bizas. Dont a ra Bizañs eus "Bizantium", hemañ an anv latin treuzskrivet diouzh ar gresian Βυζάντιον. Diwar e saviad dibar e kreskas an armerzh diwar an eskemmoù bras etre ar Balkanoù hag Azia. Ne oa nemet ur porzh bihan a-walc'h war ribl un aber bihan digoret war strizh-mor ar Bosfor, ar C'horn Aour e anv.

Pa oa aet an annezidi war gostezenn Pescennius Niger e reas seziz Bizanns an danvez-impalaer Septim Sever e 196 hag e oe distrujet diwar-se. Met Septim Sever a lakaas ar geoded da vezañ adsavet hag e teuas ar pinvidigezh en-dro.

[kemmañ] Impalaeriezh roman ar Reter

Kompren a reas gallusterioù al lec'h an impalaer roman Kustentin Meur pa tivizas e vije adkempennet ar geoded evit sevel "Roma nevez". Urzhiañ a reas ma vo savet ilizoù, plasennoù, boulouardoù ha lec'hioù foran eus ar re gaerañ. Goude e varv hag eñ beziet e Iliz an Daouzek Abostol tost da vezioù an dud eus ar santelañ-se e oa anvet ar gêr nevez Kergustentin.