ჭადრაკი
ვიკიპედიიდან
ჭადრაკი არის ინტელექტუალური თამაში, რომელიც ხორციელდება ორ მოთამაშეს შორის. ამისათვის ისინი იყენებენ მომცრო ზომის ხის დაფას, რომელიც შედგება შავ-თეთრად დაყოფილი 64 უჯრისაგან. თითოეული მოთამაშის განკარგულებაშია 16-16 ფიგურა: მეფე, ლაზიერი, 2 კუ, 2 მხედარი, 2 ეტლი და 8 პაიკი.
ჭადრაკი ინდოეთში, მკვლევარების აზრით, VI საუკუნეში გამოიგონეს. მისი შექმნის შესახებ მრავალი ლეგენდა არსებობს. აი, რას მოგვითხრობს ერთ-ერთი ლეგენდა: ვინმე სინმა დიდხანს ფიქრისა და შრომის შემდეგ გამოიგონა ჭადრაკი. მან თავისი გამოგონება სამეფო თამაშად მიიჩნია და რაჯას მიართვა. რაჯა დიდად კმაყოფილი დარჩენილა ნაბოძები თამაშით, მოსწონებია ჭადრაკში ჩაქსოვილი ბრძოლის სიბრძნე. - რით დაგასაჩუქრო კარგი თამაშის გამოგონებისათვის? - უკითხავს რაჯას. - მინდა, რომ იმდენი ხორბლის მარცვალი მომცეთ, რამდენიც მომიწევს ჭადრაკის სათამაშო დაფიდან, თუ პირველ უჯრაზე ერთ მარცვალს დადებენ, მეორეზე ორს, მესამეზე - ოთხს, მეოთხეზე - რვას, მეხუთეზე - თექსვმეტს, მეექვსეზე - ოცდათორმეტს და ასე შემდეგ (გეომეტრიული პროგრესიის მიხედვით). რაჯას გასცინებია - საწყალ კაცს მოშიებიაო და ბრძანა დაეთვალათ და მიეცათ სინისთვის კუთვნილი მარცვალი. გამოვიდა, რომ სინს ეკუთვნოდა 18446744073709551615 ცალი მარცვალი (თვრამეტი კვადრილიონ ოთხასორმოცდაექვსი ტრილიონ შვიდას ორმოცდაოთხი ბილიონ სამოცდაცამეტი მილიარდ შვიდასცხრა მილიონ ხუთას ორმოცდათერთმეტი ათას ექვსას თხუთმეტი) აგრეთვე მოახსენეს რაჯას, რომ ამ რაოდენობის მარცვალი დედამიწას ხუთ სანტიმეტრიანი ფენით დაფარავდა და გადასაზიდად ათი ათასი უღელი ხარ-კამეჩი არ ეყოფოდა.
