Tour de Francia
Na Galipedia, a wikipedia en galego.
O Tour de Francia ("Volta" a Francia) é unha competición ciclista por etapas, a máis afamada de todas, que se disputa en Francia e outros países limítrofes durante tres semanas do mes de xullo. Comezou a celebrarse en 1903 con periodicidade anual que só foi interrumpida entre 1915 a 1918 a causa da Primeira Guerra Mundial e desde 1940 ata 1946 pola Segunda Guerra Mundial.
Constitúe, polo tanto, a carreira máis importante dentro da clasificación ciclista que establece a UCI ProTour; xunto coa Vuelta Ciclista a España e o Giro de Italia constitúe o grupo das Grandes Voltas de tres semanas.
Índice |
[editar] Historia
O primeiro Tour tivo lugar no ano 1903, como unha iniciativa do diario L'Auto. Pouco a pouco, foi adquirindo prestixio como carreira ciclista ata, na actualidade, elevarse ata a posición de evento ciclista máis importante do ano. Na actualidade, e a diferencia dos seus comezos (nos que tiña poucas etapas pero moi longas), o Tour ten 21 etapas e 2 días de descanso para os corredores.
O Tour adoita ter lugar en territorio francés; así e todo, é moi frecuente que unha ou varias etapas comecen, rematen ou pasen por outros países, como Italia, España, Suíza, Bélxica, Luxemburgo, Países Baixos, Alemaña e incluso o Reino Unido ou Irlanda.
O percorrido do Tour cambia tódolos anos. Na primeira etapa, adoita haber un prólogo (breve contrarreloxo individual); a continuación, unha primeira semana na que non se atravesan grandes dificultades montañosas; unha contrarreloxo; e a continuación o paso polas dúas grandes cadeas montañosas (Pireneos e Alpes ou Alpes e Pireneos, a anos alternos); logo, outra contrarreloxo que ten lugar o penúltimo día; e, ó final, unha etapa chá que remata nos Campos Elíseos de París. Tamén é habitual que haxa na primeira semana unha contrarreloxo por equipos.
Na actualidade, e tras 16 anos baixo a dirección de Jean-Marie Leblanc, o director do Tour é Christian Prudhomme.
[editar] Maillots
Ó igual ca outras carreiras ciclistas, o Tour de Francia ten diferentes clasificacións, ó primeiro clasificado das cales se lle dan determinadas mallas:
- Maillot jaune (amarelo) ó lider da clasificación xeral da carreira (o gañador).
- Maillot vert (verde) para o ciclista que acadou maior número de puntos na clasificación dos sprints (que se obteñen ós finais das etapas e nos sprints intermedios).
- Maillot à pois rouges (a puntos vermellos) para aquel que ten maior número de puntos na clasificación da montaña (estes puntos obtéñense ó pasar nos primeiros postos polo cume dos montes. Canto maior sexa a categoría das montañas, maior é a cantidade de puntos).
- Maillot blanc (branco) para o ciclista novo (de menos de 25 anos) que mellor clasificado está.
Outras clasificacións teñen outras formas de sinalarse:
- A clasificación da combatividade. Cada día, os xuíces escollen o corredor máis combativo da etapa anterior e proporciónanlle un dorsal (o número que levan nas costas) vermello para o distinguir.
- A clasificación por equipos. Para calculala, súmanse os tempos de carreira dos tres primeiros corredores do equipo. Tódolos ciclistas do equipo que ocupa o primeiro lugar nesta clasificación reciben un dorsal amarelo.
Como en tódalas demais carreiras, o campión do mundo pode levar a malla arco-da-vella que o diferencia, e os campións nacionais poden levar a malla do seu propio país.
[editar] A carreira
No respectivo ás etapas de contrarreloxo e de montaña, o Tour funciona como tódalas demáis Grandes Voltas. Sen embargo, ten certos detalles que o diferencian:
[editar] A contrarreloxo por equipos
Na meirande parte dos Tours, adoita haber unha contrarreloxo por equipos na primeira semana. Sen embargo, este feito deu lugar a moitas críticas a raíz de que Lance Armstrong, que dispuña dun equipo moi forte, se distanciaba moito dos seus rivais, con equipos máis modestos. Para tentar solucionalo, o Tour estableceu unha norma na contrarreloxo por equipos, que tamén recibiu grande cantidade de críticas.
Esta norma di que o máximo tempo que pode perder o segundo equipo respecto do primeiro clasificado é de 20 segundos. No caso do terceiro, son 30 segundos (tamén respecto do primeiro); o cuarto, 40; e así sucesivamente ata o decimoquinto clasificado, que pode perder como máximo 2 minutos 30 segundos (150 s). A partir de alí, as diferenzas van de 5 en 5 segundos.
Por exemplo, se nunha carreira o segundo equipo chega con 5 minutos de retraso respecto do primeiro, cóntase como se só perdese 20 segundos. Pola contra, se chega a 5 segundos este tempo manténselle.
[editar] As bonificacións e as chegadas
Durante todo o Tour (diferenciándose nisto, por exemplo, da Vuelta a España, que só o fai na primeira semana), os corredores que chegan nos primeiros postos á meta reciben unha bonificación que lles desconta segundos (20 ó primeiro, 12 ó segundo, 8 ó terceiro).
En 2006 decidiuse que a aqueles ciclistas que caesen nos últimos 3 quilómetros de cada etapa se lles daría o tempo que terían conseguido se non tivesen caído.
[editar] Cronoloxía cos gañadores do Tour de Francia
