Nomo de Origino
El Vikipedio
Nomo de Origino tradukas la francan esprimon Appellation d'Origine Contrôlée (AOC), kiun regas en Francio la Institut National des Appellations d'Origine (INAO). La samo ekzistas en aliaj landoj kiel ekzemple :
- en Italio: Denominazione di Origine; oni distingas inter DOP (protektata nomo de origino), DOC (kontrolata nomo de origino) kaj DOCG (kontrolata kaj garantita nomo de origino),
- en Hispanio: Denominación de Origen,
- en Portugalio: Denominação de Origem Controlada.
Nomo de Origino estas oficiala permeso uzi nomon por iu aĵo, kiu povas esti produktata nur en difinita regiono, kaj estas protektata en aliaj landoj danke al internaciaj traktatoj.
Per tiu pruvo de deveno, la produktistoj pliprestiĝigas la varon. Krom la landa kondiĉo, originnoma produktado devas sekvi regulojn pri ingrediencoj, labormanieroj, etikedoj kaj kvantoj.
Kvalitaj variaĵoj de vinoj kaj fromaĝoj ofte ricevas nomon de origino. Ekzemple, ŝereo uzas la nomojn Jerez/Xerés/Sherry. Ĉampano uzas Champagne.
En la Eŭropa Unio leĝaro, AOC nomiĝas AOP por Appellation d'Origine Protégée, kiun oni povas traduki per Atesto de Origino Protektita.
