ഹിമാലയ പര്വ്വതം
വിക്കിപീഡിയ, ഒരു സ്വതന്ത്ര വിജ്ഞാനകോശം.
ഇന്ത്യന് ഉപഭൂഖണ്ഡത്തിന്റെ ഭൂമിശാസ്ത്രപരവും സാംസ്കാരികവും ആയ വ്യത്യസ്തതക്കുള്ള മുഖ്യ കാരണഹേതുവായ പര്വ്വത നിരയാണ് ഹിമാലയ പര്വ്വതം. മഞ്ഞിന്റെ വീട് എന്നാണ് ഹിമാലയം എന്ന നാമത്തിന്റെ അര്ത്ഥം.
ഉള്ളടക്കം |
[തിരുത്തുക] ചരിത്രം
മടക്കു പര്വതങ്ങളില് പെടുന്ന ഹിമാലയം, ഇന്തോ-ആസ്ത്രേലിയന് ഭൂഫലകം, യൂറേഷ്യന് ഭൂഫലകം എന്നിവയുടെ കൂട്ടിമുട്ടലില് നിന്നും ഉടലെടുത്തതാണെന്ന് കരുതുന്നു. ഏതാണ്ട് 70 ദശലക്ഷം വര്ഷങ്ങള്ക്കുമുന്പാണീ കൂട്ടിയിടി നടന്നത്.
ഭാരത ചരിത്രവുമായി ഹിമാലയം ചേര്ത്തുകെട്ടപെട്ടിരിക്കുന്നു. ക്രിസ്തുവിനു രണ്ടായിരം വര്ഷങ്ങള്ക്കു മുമ്പെങ്കിലും തന്നെ ഹിമവാന്, ഹിമാലയം, ഹൈമവതി മുതലായ വാക്കുകള് ഉപയോഗിച്ചിരിക്കുന്നതായി കാണാം. ഹൈന്ദവ ചരിത്രവുമായി ഹിമാലയത്തിന് അഭേദ്യമായ ബന്ധങ്ങളുണ്ട്. പരമശിവന്റെ ആസ്ഥാനമായ കൈലാസം ഹിമാലയത്തിലാണ്. പാര്വതി ദേവി ഹിമവാന്റെ പുത്രിയാണെന്നാണ് വിശ്വാസം. രാമായണം, മഹാഭാരതം എന്നിവകളിലും പുരാണങ്ങളിലുമെല്ലാം തന്നെ ഹിമാലയത്തെ പരാമര്ശിച്ചിരിക്കുന്നതു കാണാം.
[തിരുത്തുക] പ്രത്യേകതകള്
ലോകത്തിലെ ഏറ്റവും ഉയരം കൂടിയ പര്വ്വത നിരയാണ് ഹിമാലയ പര്വ്വത നിര. ലോകത്തിലെ ഏറ്റവും ഉയരംകൂടിയ കൊടുമുടിയായ എവറസ്റ്റ് ഹിമാലയത്തിലാണ്. 2410 കിലോമീറ്റര് ആണ് ഹിമാലയത്തിന്റെ നീളം. പടിഞ്ഞാറ് സിന്ധു നദി മുതല് കിഴക്ക് ബ്രഹ്മപുത്ര നദി വരെ ഉള്ള പര്വ്വതങ്ങളെ ആണ് ഹിമാലയം എന്നതുകൊണ്ടുദ്ദേശിക്കുന്നത്.
സമാന്തരങ്ങളായ മൂന്നു നിരകള് ചേരുന്നവയാണ് ഹിമാലയം. ഹിമാദ്രി(Greater Himalaya), ഹിമാചല്(Lesser Himalaya), സിവാലിക്(Outer Himalaya) എന്നിവയാണവ. ടിബറ്റന് ഹിമാലയം(Trans Himalaya) ഹിമാലയത്തിന്റെ വടക്കായി നിലകൊള്ളുന്നു.
[തിരുത്തുക] ഹിമാദ്രി
ഹിമാലയത്തിന്റെ വടക്കേ നിരയാണിത്. ഏറ്റവും ഉയരം കൂടിയതും നിരകളില് ആദ്യമുണ്ടായവയും ആണ് ഈ നിര. എവറസ്റ്റ്, കാഞ്ചന് ജംഗ, നംഗ പര്വതം, നന്ദാ ദേവി തുടങ്ങി ഒട്ടനവധി കൊടുമുടികള് ഈ നിരയിലാണുള്ളത്.
[തിരുത്തുക] ഹിമാചല്
ഹിമാദ്രിക്കു തൊട്ടു തെക്കായുള്ള ഈ നിര അത്ര തന്നെ ഉയരമില്ലാത്ത പര്വ്വതങ്ങളെ ഉള്ക്കൊള്ളുന്നു. ഡാര്ജിലിംഗ്, മസ്സൂറി, നൈനിറ്റാള് തുടങ്ങി ഒട്ടനവധി സുഖവാസ കേന്ദ്രങ്ങളെ ഈ പ്രദേശം ഉള്ക്കൊള്ളുന്നു. ഹിമാചല് ഏകദേശം പൂര്ണ്ണമായും ഇന്ത്യയിലാണുള്ളത്.
[തിരുത്തുക] സിവാലിക്
ഹിമാലയത്തിന്റെ ഏറ്റവും തെക്കുള്ള നിര. ഉരുള് പൊട്ടല്, ഭൂകമ്പം എന്നിവ ഈ നിരയില് സാധാരണമാണ്. ഡൂണ്സ് എന്നറിയപ്പെടുന്ന വിസ്തൃത താഴ്വരകള് സിവാലിക് നിരയിലാണ്(ഉദാ: ഡെറാഡൂണ്).
[തിരുത്തുക] പരിസ്ഥിതി
വളരെയധികം വൈവിധ്യം നിറഞ്ഞ ജീവജാലങ്ങള് ഇവിടെയുള്ളതിനാല് ലോകത്തിലെ മഹാ വൈവിധ്യ പ്രദേശങ്ങളില് ഒന്നായി ഈ പ്രദേശത്തെ കണക്കാക്കുന്നു. യതി മുതലായ ഇന്നും തീര്ച്ചപ്പെടുത്താന് കഴിയാത്ത ജീവികളും ഇവിടെ ഉണ്ടെന്നാണ് തദ്ദേശവാസികള് പറയുന്നത്. ആഗോള താപനവും മലകയറ്റക്കാരും പരിസ്ഥിതിക്ക് നാശം വരുത്തുന്നതായി കരുതുന്നു.
ഇന്ത്യയിലെ മലനിരകള് |
---|
ഹിമാലയം | പശ്ചിമഘട്ടം | വിന്ധ്യപര്വ്വതം | സത്പുര | പൂര്വ്വാചല് | പൂര്വ്വഘട്ടം |
കൊടുമുടികള് |
കെ.2 | നംഗപര്വ്വതം | നന്ദാദേവി | കാഞ്ചന്ജംഗ | ആനമുടി | അഗസ്ത്യകൂടം |