Втора Светска војна
Од Википедија, слободна енциклопедија
Втората Светска војна е глобален конфликт што почнува на 7 јули 1937 година, во Азија, и на 1 септември 1939 во Европа и трае до 15 август 1945 со капитулацијата на Јапонија. Втората Светска војна ги зафати мнозинството на земји во светот на секој населен континент. Речиси сите земји што биле вклучени во Првата Светска војна биле инволвирани и во Втората Светска Војна. Таа е најголемиот и најскапиот вооружен конфликт во светската историја.
Причините за војната, кои најчесто се припишуваат на Версајскиот договор, Големата депресија, национализмот и милитаризмот, се предмет на дебати. На кој датум војната започнала е исто така предмет на расправа, најчесто се смета дека таа официјално започнала со германската инвазија на Полска на 1 септември 1939, но исто така се наведуваат и други дати - јапонската инвазија на Кина на 7 јули 1937 (почетокот на Втората Кинеско-јапонска војна), или уште порано - во 1931 со јапонската инвазија на Манџурија. Некои, пак, сметаат дека Првата и Втората Светска војна се еден конфликт раздвоен само со "прекин на огнот".
Борби се воделе низ Атлантскиот Океан, Западна и Источна Европа, Средоземно Море, Африка, Блиски Исток, Источна и Југоисточна Азија. Во Европа војната завршила со капитулацијата на Германија, на 8 мај 1945, но продолжила се во Азија се до поразот на Јапонија на 15 август 1945.
Се претпоставува дека околу 57 милион луѓе загинале во војната, вклучувајќи геноцид како што е Холокаустот. Втората Светска војна е пример за тотална војна, каде што се вклучени и фронтот и бомбардирањето на цивили. Атомската бомба, млазниот авион и радарот се само некои од изумите за време на војната.
Поствоена Европа била поделена на Западна и Советска сфера на влијание. Првата доживува економска реконструкција преку Маршаловиот план, додека пак источните земји станале сателити на СССР. Во воена смисла, Западна Европа, во најголем дел била инкорпорирана во НАТО, а Источна Европа во Варшавскиот пакт, сојузи меѓу кои се водеше Студената војна. Во Азија, американската воена окупација на Јапонија доведе до нејзина вестернизација, додека пак Кина се подели на комунистичка Народна Република Кина и националистичка Република Кина (Тајван).
