Baevaart
Van Wikipedia
- Dit artikel is gesjreve in 't Valkebergs. 't Weurt gewaardeerd óm in dit artikel woe meugelik 't Valkebergs aan te hawte.
'n Baevaart of pelgrimstoch ies 'ne toch, dae individueel of in 'ne groep weurt óndernómme nao 'n pelgrimsoord. In väöl godsdeenste besjteit de gedachte, dat 'ne god of heilige aan bepaalde plaatse 'n heiliging of zegening haet verbónge. Zoa gebeurt dat o.m. door Katholieke, Anglicane of Moslims, die nao 'n heiligdóm of cultusplek loupe um te baeje, te biechte of boete te doon. Sóms ouch um 'n guns te vraoge.
Inhawd |
[bewirk] Christendom
In 't christendom vingk de baevaart ziene oarsjprónk in de aandach veur 't leve van Jezus, dat luuj deeg trèkke nao de heilige plaatse van geboorte, leve, lieje en sjterve in Palestina. Ouch de graver van de apostele zint geleefde pelgrimsoorde. Väöl Mariabaevaartsplaatse sjteune op historische en legendarische gebeurtenisse.
[bewirk] Mieddelièwe
In de Mieddelièwe waore pelgrimstochte populair en officieel. De kèrk sjteunde de tochte nao o.m. Jeruzalem, Roame en Santiago de Compostella, deils ouch es boetevaart.
[bewirk] Doel
Baevaarte weure gehoute um boete te doon of um 'n bepaalde guns te vraoge. Dao zint baevaarte veur allerlei krenkdes: tege kanker, kaelpien, bèdplasse, kinkhoos. Veur 'n gooj ougs. In de keus van 'ne bepaalde petroanheilige kump de opvatting tot uting um analoog aan gegeves oet 't leve of martelaarsjap van de heilige, deze te vraoge veur 'n guns. Zoa ies de heilige Briej (Norbik) petroan van 't viè en de heilige Rosa (Sub) tege roas, de heilige Blasius (Keer) tege kaelkrenkdes, Gerlachus (Sint-Gerlach) tege vièkrenkdes en 't heilig Blood tege blojinge. In de pelgrimskèrke bevinge ziech dèks de relikwieë van de (petroan)heilige.
[bewirk] Attribute
't Baevaartsvaeneke mèt aafbeelding ies 'n aandinke of souvenir ter herinnering aan 't bezeuk aan 'n baevaartsoord.
'n Baevaartskeerts weurt dèks mètgenómme um thoes te gebruke.
Pelgrims op weeg nao Santiago de Compostella drage 'n Sint-Jaokobssjelp.
[bewirk] Bekènde baevaartsplaatse
- Lourdes in Zuud-Frankriek. Hie weure Maria en Bernadette verièrd en veur genezing gebaejd.
- Fatima in Portugal. Verièring van Maria
- Santago-de-Compostella. Hie weurt de apostel Jaokob de Mièrdere verièrd.
- Roame in Italië
- Jeruzalem in Israël,pelgrimsoord veur Jezus
- Sainte-Maries-de-la-Mer, pelgrimsoord van Maria, Sarahh en van de Roma (Siguinersj)
- Lisieux (Frankriek), Theresia
- Paries, Maria van de miraculeuze medalje
- Taizé (Frankriek)
- Vezelay,(Frankriek) (Maria Magdalena)
- La-Sainte-Baume en St. Maximin (Frankriek) (Maria Magdalena)
- Paray-le-Monial (Frankriek) Margaretha Maria Alacoque
- Kevelaer in Duutsjland, pelgrimsoord van Maria.
[bewirk] In de Euregio
- Banneux in Belsj, pelgrimsoord van Maria.
- Sjerpenheuvel in Belsj, pelgrimsoord van Maria
- Beauraing in Belsj, pelgrimsoord van Maria, moder mèt 't gouwe hart
- Hasselt (Belsj), Virga Jesse en pater Valentius
- Zoutleeuw (Belsj), Maria van de Osseweg
- Mestreech pelgrimsoord van Servaos en Maria sjter van de ziè
- Wittem in Zuud Limburg, pelgrimsoord van Gerardus
- Sint-Gerlach in Zuud Limburg, pelgrimsoord van Gerlachus
- Hozelt (Holset), Zuud Limburg, Genoveva
- Gulpe, Zuud Limburg, Maria keuningin
- Broensem, (Brunssum) Zuud Limburg, Heilig sacrament
- Heële (Heerlen), Zuud Limburg, Petrus Jozef Savelberg
- Remunj (Roermond), Nederlands Limburg, Maria van 't zand
- Zittert (Sittard), Zuud Limburg, Maria van 't heilig hart
- Zjweikese (Sweikhuizen), Zuud Limburg, Odiliadevotie
- Toear (Thorn), Nederlands Limburg, Maria ónder de ling
