Ambiente
Na Galipedia, a wikipedia en galego.
Índice |
[editar] Definición
Enténdese por ambiente a contorna ou suma total daquilo que nos rodea e que afecta e condiciona especialmente as circunstancias de vida das persoas ou a sociedade no seu conxunto. Comprende o conxunto de valores naturais, sociais e culturais existentes nun lugar e nun momento determinado, que inflúen na vida do ser humano e nas xeracións vindeiras. É dicir, non se trata só do espazo en que se desenvolve a vida senón que tamén abrangue seres vivos, obxectos, auga, chan, aire e as relacións entre eles, así como elementos tan intanxibles como a cultura.
[editar] Teoría Xeral de Sistemas
Na Teoría Xeral de Sistemas, un ambiente é un complexo de factores exteriores que actúan sobre un sistema e determinan o seu curso e a súa forma de existencia. Un ambiente podería considerarse como un superconxunto, no cal o sistema dado é un subconxunto. Un ambiente pode ter un ou máis parámetros, físicos ou doutra natureza. O ambiente dun sistema dado debe interactuar necesariamente con el.
[editar] Medicina
En epidemioloxía, o ambiente é o conxunto de factores chamados factores extrínsecos, que inflúen sobre a existencia, a exposición e a susceptibilidade do axente en provocar unha enfermidade ao hóspede.
Estes factores extrínsecos son:
- Ambiente físico: Xeografía Física, Xeoloxía, clima, contaminación.
- Ambiente biolóxico:
- poboación humana: Demografía.
- Flora: fonte de alimentos, inflúe sobre os vertebrados e artrópodos como fonte de axentes.
- Fauna: fonte de alimentos, hóspedes vertebrados, artrópodos vectores.
- Auga.
- Ambiente socioeconómico:
- ocupación laboral ou traballo: exposición a axentes químicos, físicos.
- Urbanización ou contorna urbana e desenvolvemento económico.
- Desastres: guerras, inundacións.
[editar] Desenvolvemento histórico do concepto de ambiente
- Hipócrates (460-375 anos antes de Cristo), na súa obra Aires, augas e lugares, resalta a importancia do ambiente como causa de enfermidade.
- Thomas Sydenham (1624-1689) e Giovanni Maria Lancisi (1654-1720), formulan a teoría miasmática, na que o miasma é un conxunto de emanacións fétidas de chans e augas impuras que son causa de enfermidade.
- No século XIX con Chadwick, William Farr (1807-1883) coa mortalidade dos mineiros, John Snow (1813-1858) con "Sobre o modo de transmisión do cólera", consolídase a importancia do ambiente en epidemioloxía e a necesidade de utilizar métodos numéricos.
