Ynternet

In ynternet is in samling fan kompjûternetwurken. Wylst in kompjûternetwurk gewoanwei bestiet út fysyke komponinten (kabels, skeakelingen ensfh.), bestiet in ynternet allinne út in samling protokollen, yn it gefal fan 'it' ynternet, it saneamde IP (internet protocol). Kompjûters yn ferskillende netwurken en mei ferskillende bestjoeringssystemen kinne troch it tapassen fan dy protokollen meiinoar kommunisearje. In fysyk kompjûternetwurk is meast beheind ta in gebiet of organisaasje. It systeem fan ûnderlinge kommunikaasje tusken kompjûters yn sa'n beheind netwurk wurdt ek wol yntranet neamd. Fanút geandewei mear yntranetwurken is der ek tagong ta it ynternet mooglik, wylst der ek in tendins is dat guon siden op it www allinne foar persoanen as organisaasjes tagonklik binne dy't dêr spesjaal foar machtige binne.

Wat yn it spraakgebrûk as it ynternet oantsjutten wurdt is in grut iepenbier kompjûternetwurk, wêrby de ôfspraken besteane út Requests For Comments, beheard troch de Internet Engineering Task Force. Der is feitlik gjin eigner fan it ynternet.

Wylst it ynternet op himsels yn 1983 ûntstean is, is it earst sûnt augustus 1991 beskiber foar it grutte publyk. Doe waard HTML yntrodusearre, wêrtroch it ynternet brûkt wurde koe as in wrâld-wiid-web (WWW) fan siden mei klikbere keppelings. De measte dokuminten dy't fia it ynternet op te freegjen binne, binne no opmakke yn HTML.