Marilyn Monroe
El Vikipedio
Marilyn MONROE (origine: Norma Jane MORTENSON aŭ BAKER) (naskiĝis la 1-an de junio, 1926, mortis la 5-an de aŭgusto, 1962) estis usona aktorino.
Monroe naskiĝis en Losanĝeleso, Kalifornio. Post malriĉa infanaĝo ŝi je la aĝo de 16 jaroj edziniĝis kaj eklaboris en aviadilfabriko. Tie ŝi ekkonis fotiston, fariĝis fotomodelo, blondigis siajn harojn kaj baldaŭ estis malkovrata de filmentreprenistoj. Sian pseŭdonimon Marilyn Monroe ŝi ekuzis en 1948, kiam ŝi unuafoje subskribis filmkontrakton.
La roloskemo ĉiam estis la sama: bela, naiva, sekse alloga. Tion atendis la publiko, kaj kelkaj provoj, eskapi al pli postulemaj roloj (ekz. en The prince and the showgirl) ne estis vere akceptataj, tiel ke la aktorino rezignacie revenis al sia kutima rolaro. Intertempe ŝi denove estis edziniĝinta: unue kun la sportisto (bazopilko) Joe DiMaggio kaj poste kun la verkisto Arthur Miller. Ankaŭ la edzeco kun Miller fiaskis: dum la laboroj por la filmo The Misfits, kies scenaron li verkis, la paro disiĝis. The Misfits restis la lasta filmo de Marilyn Monroe: en la aĝo de 36 jaroj ŝi mortis pro trodozo da dormigiloj en Losanĝeleso.
[redaktu] Listo de filmoj
- Asphalt Jungle (Usono, 1950)
- Niagara (Usono, 1952)
- Monkey Business (Usono, 1952)
- Gentlemen Prefer Blondes (Usono, 1953)
- How to Marry a Millionaire (Usono, 1953)
- River of no Return (Usono, 1954)
- The Seven Year Itch (Usono, 1955)
- Bus stop (Usono, 1956)
- The Prince and the Showgirl (Britio, 1957)
- Some Like it Hot (Usono, 1959)
- Let’s Make Love (Usono, 1960)
- The Misfits (Usono, 1961)
 |
 |
 |
