Octavie Modert
Vu Wikipedia, der fräier Enzyklopedie.
D'Octavie Modert (*15. November 1966 zu Gréiwemaacher) ass eng lëtzebuergesch Politikerin.
No hirer Première zu Iechternach am Lycée studéiert d'Octavie Modert Droit op der Université Robert Schuman vu Stroossbuerg a mécht 1991 e Master of Arts in European Studies op der Universitéit vu Reading.
D'Octavie Modert schafft kuerz fir d'Parlamentsfraktioun vun der CSV a wiesselt 1992 an de Staatsministère. 1998 gëtt si mat 31 Joer zur Generalsekretärin vum Regierungsrot ernannt. Parallel dozou ass si d'Kabinettscheffin vum Premier Jean-Claude Juncker. Dat Joer dropp gët si als éischt Fra Première Conseillère du Gouvernement genannt.
Zënter 1986 engagéiert d'Octavie Modert sech an der CSV an hiren Ënnerorganisatiounen, der CSJ an den CSF. 2004 gëtt si an d'Chamber gewielt an den 31. Juli 2004 an der Regierung Juncker-Asselborn, déi aus dës Wahlen ervirgoung, zur Staatssekretärin fir Landwirtschaft, Wäibau a Ländlech Entwécklung an zur Staatssekretärin fir Kultur, Héichschoulen a Fuerschung, souwéi fir d'Relatioune mam Parlament, ernannt.
D'Octavie Modert ass bestued mam Jemp Stronck, Wënzer zu Greiweldeng.
