Economie
Vu Wikipedia, der fräier Enzyklopedie.
De Begrëff Economie (v. gr.: oïkos - "Haus" an nomos - "verwalten"), oder Wirtschaft (v. dt.: "Wäert schafen") ëmschreift all Ariichtungen an Handlunge vu Mënsche mat dem Zil, déi an der Ëmwelt disponibel Ressourcen an déi vum Mënsch geschafe Ressourcen optimal ze notzen, fir den Erhalt an d'Sécherheet vum Liewe vun de Mënschen ze garantéieren an ze fërderen, wéi och hir materiell an immateriell Besoinen ze befriddegen.
D'Besoinen vum Mënsch kënnen an dräi Beräicher opgedeelt ginn, deer hir Reienfolleg eng Prioriséirung bei der Zoudeelung vu Gidder erméiglecht:
- Existenzbedürfnisser ëmfaassen ënner anerem de Besoin no genuch Iessen, Flëssegkeet a Wunnraum;
- Grondbedürfnisser a
- Luxusbedürfnisser kënnen dogéint net generaliséiert beschriwwwe ginn. Si hänke vum Stand vun der jeweileger Gesellschaft of. Esou kann an enger moderner westlecher Economie d'Sécherheet oder déi international Mobilitéit schonn als Grondbedürfnis ugesi ginn, an anere Gesellschaften dogéint nach als Luxusbedürfnis.
D'Economie huet eng Responsabilitéit als eng vun de gestaltende Forcen an der Gesellschaft. Mat dëser Dimensioun vun der Gestaltung ass d'Wirtschaftsethik befaasst. Vill Beroder vun Entreprisen weisen op d'Geforen hinn, an déi sech Entreprise beginn, wa se offensichtlech egoistesch handelen an doduerch hire gudde Ruff bei potentielle Clienten a Geschäftspartner schiedegen.
Wat lo d'Lëtzebuerger Wirtschaftsstruktur ugeet, do ënnerscheede mir méi besonnech d' Landwirtschaft, de Wäibau, an de Biergbau, d'Industrie, den Handel, d'Finanzservicer an déi aner Servicer. Den Akerbau, de Wäinbau an den Biergbau gin vun den Economisten als Primären Wirtschaftsektor, d'Industrie als Sekundären Wirtschaftssektor an den Handel, d'Finanzservicer souwéi déi aner Servicer als Tertiären Wirtschaftsektor bezeechent. An deem Zesummenhang hun d'Economisten Colin Clark a spéider de Jean Fourastié an W.W. Rostow eng Théorie entweckelt, wouno d'Wirtschaftsentwecklung duerch eng Verschiebung vun den Aktivitéiten aus dem primären an den sekundären an duerno an den tertiären Sektor gekennzeechent ass.
Ee Standardwierk iwwert d'Economie, Economics: An Introductory Analysis, gouf vum US-amerikaneschen Economist Paul Anthony Samuelson geschriwwen. Et gëtt och an de Schoule benotzt an ass dat Textbuch iwwert d'Economie, dat an der Welt déi gréissten Oplag huet.
