Erich Maria Remarque
El Vikipedio
Literaturo > Germanlingva Literaturo > Erich Maria REMARQUE < Germana lingvo
Erich Maria REMARQUE [eriĥ maria reMAK] (naskiĝis la 22-an de junio, 1898, mortis la 25an de septembro, 1970) estis germana verkisto.
Remarque naskiĝis en Osnabrück. Lia origina nomo estis Erich Paul REMARK, ekde 1923 li nomis sin REMARQUE. Kiel 18-jarulo li kiel soldato iris al la fronto. Post la Unua mondmilito li vivtenis sin inter alie kiel librotenisto, komercisto, instruisto kaj redaktoro.
En la jaro 1929 Remarque publikigis sian plej faman verkon Im Westen nichts Neues (En Okcidento nenio nova), kiu el la perspektivo de 19-jara frontsoldato priskribis la tutan kruelecon de la Unua mondmilito. Pluraj fortaj, efektaj kaj pensigaj verkoj sekvis. Ili en efika, emociiga lingva stilo realisme priskribis la tempon tuj post la milito (kaj la paradoksecon kaj cinismon de la socia "moralo" rilate tion) en Der Weg zurück (La vojo reen). Aliaj verkoj temas pri la jaroj postaj, ĉefe la nazitempaj jaroj, kaj duamilitatempaj, elvokante samtempe la malfacilegajn vivproblemojn estigitaj de tiaj teruraj okazintaĵoj: la vivo de la germanfuĝintaj ekzilitoj (en scenoj kaj situo, kiuj multflanke retroviĝas nuntempe pri aliaj enmigrintoj el multaj landoj al Eŭropo), la travivaĵoj sur la orienta paffronto kaj en germanaj urboj sub la bombadoj, travivaĵoj en koncentrejo.
En la jaro 1933 la nazioj malpermesis liajn verkojn. Remarque ekde 1931 jam vivis en Svislando, poste li elmigris al Usono kaj fariĝis usonano. Li edziĝis al usona eksaktorino, Paulette Goddard. En 1948 li revenis al Svislando, kie li mortis en Locarno. Iliaj romanoj publikigitaj ĵus post la fino de la Dua mondmilito estis malbone taksitaj en Germanio, ĉar germanoj ne plu estis pretaj akcepti la priskribon de tio, kio faritis nazitempe, kune kun ĉia ties krueleco.
[redaktu] Listo de verkoj
- Die Traumbude (1920)
- Station am Horizont (1927/28)
- Im Westen nichts Neues (1929)
- Der Weg zurück (1931)
- Drei Kameraden (1938)
- Liebe deinen Nächsten (1941)
- Arc de Triomphe (1946)
- Der Funke Leben (1952)
- Zeit zu leben und Zeit zu sterben (1954)
- Der schwarze Obelisk (1956)
- Die Nacht von Lissabon (1963)
- Schatten im Paradies (1971, postmorte)
Liaj libroj estis tradukitaj en minimume 58 lingvojn.
[redaktu] En Esperanto aperis:
En okcidento nenio nova / El germana lingvo trad. de kvar. - Köln: Heroldo de Esperanto, 1929. - 252 p. : ilustr. Originalo: Im Westen nichts Neues
La Vojo Returne / El germana lingvo trad. Joseph F. Berger. - Köln: Heroldo de Esperanto, 1931. - 369 p. Originalo: Der Weg zurück
La vojo returne / El germana lingvo trad. Joseph F. Berger. - Rickmansworth: Esperanto Publ. Co., [proks. 1935]. - 369 p. Originalo: Der Weg zurück
