Genève

vanuit Wikipedia, die vrye ensiklopedie.

Ligging van Genève

Genève (Duits Genf) is op een na die grootste stad van Switserland. Dit lê aan die suidwestelike rand van die Franstalige Switserland (die Romandie, Frans: Suisse Romande), teen die uitloop van die Rhône uit die Meer van Genève. Genève is die setel van 'n groot aantal internasionale organisasies soos die Verenigde Nasies, CERN, die Internasionale Rooi Kruis, die Wêreldgesondheidsorganisasie (WHO), die Internasionale Arbeidsorganisasie (ILO), die ITU, WIPO, die Wêreld Meteorologiese Organisasie (WMO) en die Wêreldraad van Kerke (WRK).

Die stad het 184 758 inwoners (einde 2003), waarvan sowat 44% buitelanders. Die agglomerasie Genève het sowat 640 000 inwoners (2000).

Genève met sy bekende waterfontein

Die historiese stadskern van Genève lê op 'n heuwel, wat danksy die beskerming deur die Meer van Genève, die riviere Rhône en Arve en slote teen die ooste eeue lank 'n natuurlike toevlugsoord gevorm het. Ná die sloping van die versterkings in die tydperk tussen 1850 en 1880 het die stad begin uitbrei.

Die stad Genève, wat in 1842 as 'n administratiewe eenheid ontstaan het, het in 1930 met die voorstede Les Eaux-Vives, Le Petit-Saconnex en Plainpalais versmelt.

Gaius Julius Caesar het reeds in die jaar 52 v.C. na Genève as Genua verwys, terwyl die stad in later historiese dokumente Genava of Civitas Gevanensium genoem word. Dit was aanvanklik 'n oppidum van die Keltiese Allobrogers en is darna as 'n Romeinse vicus en later civitas uitgebou. Ná die volksverhuising het Genève as die hoofstad van die Boergondiërs en as 'n Frankiese nedersetting gedien.

Genève is die geboortestad van die Calvinisme en staan derhalwe ook as die "Protestantse Rome" bekend. Genève, wat in die 16de en 17de eeu as 'n belangrike toevlugsoord vir Hugenote-vlugtelinge gedien het, het sedert die 19de eeu tot die kosmopolitiese sentrum van die Franstalige Wes-Switserland ontwikkel.

Inhoud

1 Geskiedenis
2 Besienswaardighede
3 Persoonlikhede
- 3.1 Bekende burgers
- 3.2 Tydelike inwoners
4 Eksterne skakel

[wysig] Geskiedenis

Genève, soos gesien vanuit die Franse berg Sanlève

In die Keltiese tyd is Genève die hoofstad van die Allobroges
In die Romeinse Ryk dien dit as 'n brughoof
Omtrent 400 tot 1536 is die stad setel van 'n biskop
In die 5de en 9de eeu is die stad die setel van die Boergondiese Konings
1026 behoort die stad aan die Boergondiese Ryksdeel van die Heilige Roomse Ryk van die Duitse Nasie
1309 Toekenning van selfregering
1526 Die stad sluit 'n verbond met Bern en Freiburg im Üchtland
1536 Reformasie en afkondiging van die onafhanklike Republiek van Genève. Genève handhaaf nou bande met die Switserse Konfederasie
1559 Stigting van die Akademie deur Johannes Calvyn
1798-1814 Genève word deur Frankryk geannekseer
1815 Genève word 'n Switserse stad en die hoofstad van die nuwe gelyknamige kanton
1864 Die stad word die setel van die Internasionale Rooi Kruis
1873 Stigting van die Universiteit van Genève
1920- 1946 Genève is die setel van die Volkebond

Op 11 Desember vier die stad jaarliks die Escalade de Genève, die mislukte verowering deur Savoye in die jaar 1602.

[wysig] Besienswaardighede

Romaans-gotiese Katedraal Sint-Petrus (voltooi in 1232)
Geboortehuis van die filosoof Jean-Jacques Rousseau
Stadsaal (laat 15de eeu)
Setel van die Verenigde Nasies (Volkebondspaleis, Frans: Palais des Nations, tot 1939 setel van die Volkebond)
Reformasiemonument (1917)
Servetus-gedenkstein (1903)
Engelse Tuin
Botaniese Tuin
Waterfontein - Jet d'Eau
Museum van die Rooi Kruis en die Rooi Halfmaan
Salon Auto de Genève (Geneefse Motorskou, jaarliks)