Tempeliers
From Wikipedia
In 1120 wierd d’orde van de Tempeliers upgericht. Offisièl noemden ze d’Orde van d’Orme Ridders van Kristus en den Tempel van Salomong. In ’t begin was under bezoenderste doel de pelgrims die noa ’t illig land en noa Zeruzalem goengen te beschermen. Ze woaren eingenluk un gêestelikke orde die in platse van te bidden lik monnieken ôok vocht lik ridders. Lik de monnieken an z’ôok de gelofte van oarmoe en kuis’eid afgeleid.
Inoud |
[bewerk'n] De reloasie tussen de Tempeliers en West-Vloand'ren
Ôok in West-Vloand’ren woaren ze stief populair en aan ze veel bezittiengen. Under commanderieë (de name vô un lokaal oofdkwartier) in Ieper was één van d’êeste in West-Europa en moe stief grôot gewist en, mo is in de loop der tieden volledig verdwenen. Der zien wel nog de Tempelstroate en de Tempelpoarte die an under doen errinneren.
Ôok in Sliepe was ’t er un commanderieë met un kapelle en boerderie’n, en in de kerke van Sliepe woaren der glasroamen van de Tempeliers en lagen der zelfs begroaven, moa da d’is ollemolle vernietigd me den Êeste Weireldoorloge.
Up de Grôte Mart van Brugge aan ze ôok drie uzen en in de Katelienestroate un refuge vô de commandeur van Sliepe.
An ’t oofd van de Tempeliers stoend er un grôotmêester. Den tiensten grôotmêester was nen Vloamieng, Gerardus van Ridefort (Gerardus van Ruddervôorde). Em was oender andere mè Diederiek van den Elzas up kruustocht gewist noa ’t Illig Land.
[bewerk'n] Den teloorgank van de Tempeliers
Omdaan ze zo populair woaren kregen ze van overols schenkiengen en werden ze stief rieke en machtig. Dorom beschuldigde Filips de Schone under van ketterieë en liet ie ol de Tempeliers uppakken en beslag leggen up under riekdommen. (Der zien zelfs geruchten da un stik van zun colère tegen de Tempeliers kwamt omdan ze nie aan willen meedoen me de Franse in de Guld'nspoornslag in 1302).
In 1312 werd d’orde officiël oentboenden. Den laatsten grôotmêester, Jacques de Molay, stierf in 1314 up de brandstapel.
[bewerk'n] Lieste van de Grôotmêesters van de Tempeliers
- Hugo de Paganis 1118/19 - 24 meie 1136/37
- Robertus Burgundio 1136/37 - 13 januoari 1149
- Ebrardus de Barris 1149 - 1152 (?)
- Bernardus de Tremelay 1152 (?) - 16 ogustus 1153
- Andreas de Montbard 1153 - 17 januoari 1156
- Bertrandus de Blanchefort 1156 - 2 januoari 1169
- Philippus de Neapoli 1169 - 1171
- Odo de Sancto Amando 1171 - 8 oktober 1179
- Arnaldus de Turre rubea 1180 - 30 september 1184
- Gerardus de Ridefort 1185 - 4 oktober 1189
- Robertus de Sablolio 1191 - 28 september 1193
- Gilbertus Erail 1194 - 21 december 1200
- Philippus de Plessis 1201 - 12 februoari 1209
- Willelmus de Carnoto 1210 - 25 ogustus 1219
- Petrus de Monteacuto 1219 - 28 januoari 1232 (?)
- Hermannus Petragoricensis 1232 (?) - 17 oktober 1244
- Richardus de Bures 1244 - 9 meie 1247
- Guillelmus de Sonayo 1247 - 11 februoari 1250
- Rainaldus de Vicherio 1250 - 20 januoari 1256
- Thomas Berard 1256 - 25 moarte 1273
- Guillelmus de Belloioco meie 1273 - 18 meie 1291
- Tybaldus Gaudini 1291 - 16 april 1293
- Jacobus de Molay 1293 - 1307 (+18 moarte 1314)
[bewerk'n] Varia
De Tempeliers zin de latste tid were vrêe populair, vôorol deur boek'n gelik Het Heilige Bloed en de Heilige Graal en natuurlik De Da Vinci Code.