Bø i Telemark

Frå Wikipedia – det frie oppslagsverket

Våpen	Kart

Grunnleggjande opplysningar
Kommunenr:	0821
Fylke:	Telemark
Administrasjonssenter:	Bø i Telemark
Flatevidd:	266 km²
Folketal:	5 307 (2006)
Målform:	Nynorsk
Internettside:	www.bo.kommune.no
Politikk
Ordførar:	Arne Storhaug (Ap) 2003-2007

Bø er ein kommune i Telemark fylke som grensar mot kommunane Seljord i nord, Nome i vest, Sauherad i sør og Notodden i aust.

[endre] Kommunikasjonar

Bø er stoppestad for tog på Sørlandsbanen og ekspressbuss-sambandet mellom Vestlandet (Haugesund/Odda/Bergen) og Oslo/Skien, samt for timebussen mellom Lunde og Kongsberg.

[endre] Naturgeografi

Bø ligg i eit grunt dalføre som er vidt og høveleg flatt. Frå Seljordsvatnet i nord renn Bøelva gjennom Bø kommune og munnar i sør ut i Norsjø via eit elvedelta som utgjer eit naturvitskapleg interessant våtmarksområde. Mot aust dannar Reshjemheia eit geografisk skilje til grannekommunen Notodden, og i nordaust ligg eit mindre høgfjellsområde, Lifjell.

[endre] Skule- og forskingssenter

I Bø ligg ein av studiestadene til Høgskolen i Telemark (HiT) som med sine 1500 studentar set sitt preg på kommunen. Frå Telemark Distriktshøgskole vart etablert i Bø i 1971 var verksemda spreidd på ulike lokalitetar over heile bygda, men det meste vart samla på ein stad då det nye høgskulebygget sto ferdig i 1994. Den vidaregåande skulen i Bø var tidlegare landsgymnas med internat. På Hellandtunet held forskingsstiftinga Telemarksforskning til, med eit fagmiljø hovudsakleg retta mot naturbasert forsking og utgreiing i tett samarbeide med høgskulen.

[endre] Kultur

[endre] Studentmiljø

Bø er senter for eit mangfaldig kulturliv. Høgskulen trekkjer til seg studentar til forfattar- og kulturstudia, og heile studentmiljøet er ein aktiv pådrivar med ymse aktivitetar året rundt og ikkje minst den landskjende Kroa i Bø som opp gjennom åra har opparbeida seg eit ry som ei av landets beste konsertscener.

[endre] Folkemusikk

Med si plassering i hjartet av Telemark, har folkemusikken vore ein nesten sjølvsagt hovuddel av Bø-bygda sitt kulturliv. Det er ikkje tilfeldig at det er dei tre felene som pregar kommunevåpenet. Både felemakarar og felespelarar har sett sitt preg på folkemusikkmiljøet, både i Bø og resten av fylket. Den første landskappleiken vart arrangert i Bø i 1888. I vår tid samlast folkemusikkentusiastar på Telemarkfestivalen som går av stabelen i byrjinga av august kvart år, ein festival som etterkvart har opparbeida seg internasjonalt ry.

[endre] Kunstmålartradisjon

Ei rik kulturhistorie byr på mange kjende namn. Kunstmålaren Halvdan Egedius heldt mykje til i Bø dei siste 7-8 åra han levde. Venen og kunstmålarkollegaen Torleiv Stadskleiv var innfødd Bøhering, og desse to var saman med ei rekke tilreisande kunstnarar med på å skape eit aktivt kunstnarmiljø i Bø på slutten av 1800-talet.

[endre] Kulturanlegg

Torleiv Stadskleiv har gitt namnet sitt til Galleri Stadskleiv som er lokalisert i Gullbring kulturanlegg. Dette er eit sambruksanlegg med konsertscene, kino, symjehall og idrettshall som ligg like ved høgskulebygget. Anlegget sto ferdig i 1994 og var tidleg på vinteren dette året ein av hovudstoppestadene for fakkelstafetten i samband med Lillehammer-OL, med eit storslått fjernsynssendt kulturarrangement i det enno uferdige kulturbygget.

[endre] Turisme

I sommarhalvåret er Bø Sommarland den store turistmagneten. Denne bade- og familieparken har opplevd ein eventyrleg suksess som har gitt gode økonomiske ringverknader for bygda i seg sjølv. Lifjellområdet byr på storfelt turterreng, men det er særleg i vinterhalvåret folk kjem hit, til skitrekk og hytte- og hotellanlegg.

[endre] Personar

Aktuelle personar frå Bø i Telemark:

Hallvard Eika, tidlegare landbruksminister
Halvor Folkestad, biskop i Hamar bispedømme
Torleiv Stadskleiv, (1865-1946), kunstmålar

[endre] Bakgrunnsstoff

Telemark

Henta frå «http://nn.wikipedia.org../../../b/%C3%B8/_/B%C3%B8_i_Telemark_7ca7.html»

Kategoriar: Kommunar i Telemark | Bø i Telemark

We provide Linux to the World