Verviers

Van Wikipedia

Dit artikel is gesjreve in 't Valkebergs. 't Weurt gewaardeerd óm in dit artikel woe meugelik 't Valkebergs aan te hawte.

Liegking van Verviers in de provincie Luuk

Verviers (Waals: Vervî) ies 'n sjtad en gemeinte in de Belzje provincie Luuk. De gemeinte haet 'n oppervlak van 33,07 km² en 't aantal inweunersj ies 52.820 (1 januari 2005). Verviers ies de hoofsjtad van 't arrondissement Verviers, woa 29 gemeintes in liegke. Verviers liek aan de Vesder, neet wied van 't sjtuwmeer van Gileppe.

[bewirk] Deilgemeintes en dörper

Bie de gemeinte Verviers huère ouch de deilgemeintes

Ensival
Heusy
Lambermont
Petit-Rechain
Stembert.

[bewirk] Sjtadsfuncties

De sjtasie Verviers-Central

De sjtad ies e regionaal verzörgingscentrum. De wolindustrie, woa Verviers al ièwe in gans Europa um bekènd sjteit, ies hie nog ummer gevestig, neve metaal- en vodingsindustrie. De sjtad haet 'n hospitaal en 'n rechbank. Verviers neump ziech Capitale wallonne de l'eau, ónder andere vanwege de kortbiegelege sjtuwdam van Gileppe en de aanwezigheid van institute wie de Société wallonne des eaux. De sjtasie van Verviers, Verviers-Central, ies e sjpoorweegknouppunt aan de lien Luuk-Aoke.

[bewirk] Sjtadsbeeld

De Place Verte in 't centrum van Verviers

Verviers haet nog 'n aantal ouw hièrehoezer. 't Sjtadhoes oet 1775 ies geboewd in classicistische sjtiel. Op 't mertplein veur 't sjtadhoes sjteit 'ne perron (1732), e symbool van vrieheid en autonomie. De 17e-ièwse kèrk Notre-Dame haet meubilair oet de barok.

[bewirk] Historie

De bleuj van Verviers begoes in de 17e ièw, mèt de opkóms van de textielindustrie. Aan de sjtad woort door de prins-biessjop van Luuk de titel van "gooj sjtad" (bonne ville) gegeve in 1651. Bies 't begin van de 20e ièw waor Verviers 'n hièl belangrieke industriesjtad op dit gebied; neve de wolindustrie kaome d'r ouch fabrieke veur textielmesjiene, laerloarieje en sjoonsfabrieke. In 't miedde van de 20e ièw verplaatsde de textielindustrie ziech ummer miè nao lièg-loaneleng, woadoor väöl fabrieke oet Verviers weggónge.

De tegewoordige gemeinte Verviers óntsjtóng in 1977 bie 'n gemeintelike herindeiling. De gemeinte woort doe samegevoog mèt Ensival, Heusy, Lambermont, Petit-Rechain, Stembert en deile van Theux.