Alphonse Olterdissen
Van Wikipedia
- Dit artikel is gesjreve in 't Mestreechs. 't Weurt gewaardeerd óm in dit artikel woe meugelik 't Mestreechs aan te hawte.
Alphonse Olterdissen (Mestreech 12 december 1865 - aldao 24 februari 1923) waor 'ne Mestreechse sjriever en diechter. Zien wèrk, dat besteit oet toneelstökker en opera's, behuurt tot 't bekindste wat oets op 't Mestreechs of zelfs op 't Limburgs gesjreve is. 't Slotkoer vaan zien kemikke opera Trijn de Begijn woort later 't Mestreechs Volksleed.
[bewirk] Leve
Olterdissen woort in Mestreech gebore, mer umtot heer 'ne Duitse vaojer en 'n Zieuwse mojer had waor 't Nederlands zien mojertaol. Heer lierde 't plat evels op straot. In 1883 góng heer in Amsterdam nao de Rijksschool voor de Kunstnijverheid. Wie heer daorop aofstudeerde begós heer 'n teikesjaol in Mestreech, die gei succes woort. Laoter in de jaore negeteg begós heer ziech veur de promotie vaan 't Mestreechs toerisme in te zètte mèt de vereineging Maastricht Vooruit. Zie gebrek aon zakelikheid leverde häöm 'n enorm sjöld op.
Die sjöld perbierde heer aof te losse mèt toneelstökker en operettes. Nao e paar flops trof heer in 1907 doel mèt De kaptein vaan Köpenick, e stök op 't Mestreechs en euver 'n in die daog hendeg populair thema: de nep-kapitein Wilhelm Voigt. 't Waor mier es genoog veur zien sjöld te kinne absolvere. De twiede kemikke opera, bovegeneumde Trijn de Begijn, woort ouch 'nen hit. Bij bei stökker verzörgde zie breur Gustave Olterdissen de muziek, dee veural oet arranzjeminte vaan bekinde aria's en (kinder)leedsjes bestoont. Vaanaof 1916 hoolt heer ziech bezeg mèt 't sjrieve vaan columns, ouch op 't Mestreechs.
[bewirk] Bibliografie
- Alfons Olterdissen's prozawerken in Maastrichts dialect (bundel mèt columns, 1926)
- Mestreechs Aajd, verhaole vaan Olterdissen in de nui sjriefwies. LiLiLi 41, Uitgeverij TIC
