Menntaskólinn á Akureyri
Úr Wikipediu, frjálsa alfræðiritinu
Menntaskólinn á Akureyri (latína: Schola Akureyrensis) er íslenskur framhaldsskóli sem staðsettur er á Brekkunni á Akureyri. Skólinn á sér langa sögu og hafa margir frægir Íslendingar haft viðkomu þar í gegnum tíðina. Í dag er skólinn bóknámsskóli sem býður upp á fjögurra ára nám til stúdentsprófs.
Efnisyfirlit |
[breyta] Saga
Upphaf Menntaskólans á Akureyri er yfirleitt rakið til stofnunar Möðruvallaskóla á Möðruvöllum í Hörgárdal 1880. Þó má líta á skólann sem beint framhald af því skólahaldi sem fór fram á Hólum í Hjaltadal allt frá biskupstíð Jóns Ögmundssonar um 1106 og stóð til 1802 þegar Hólaskóli var lagður niður með konungsbréfi. Um leið og Hólaskóli hafði verið lagður niður hófst barátta norðlendinga fyrir því að „norðlenski skólinn“ yrði endurreistur þrátt fyrir það álit embættismanna Danakonungs og valdamanna í Reykjavík að ómögulegt væri að reka lærðan skóla annarstaðar á landinu en í Reykjavík. Stofnun Gagnfræðaskólans á Möðruvöllum 1880 var sigur í þeirri baráttu.
1902 brann skólahúsið á Möðruvöllum og var skólinn þá fluttur um set til Akureyrar og var þá kallaður Gagnfræðaskólinn á Akureyri. Fyrstu tvö árin á Akureyri hafði hann aðsetur í Hafnarstræti 53 en fluttist svo inn í hið nýja Gagnfræðaskólahús við Eyrarlandsveg haustið 1904 þegar bygging þess var langt komin, húsið er enn í notkun og kallast nú Gamli skóli. 1905 var skólinn tengdur Menntaskólanum í Reykjavík þannig að nemendur gátu tekið fyrstu þrjú ár hans á Akureyri og sest svo beint í fjórða bekk í Reykjavík.
Á árunum 1924-1927 fór svo fram menntaskólakennsla í fyrsta sinn í skólanum þ.e. seinni þrjú árin til viðbótar við þau þrjú sem áður hafði verið boðið uppá. Þeir nemendur sem luku því námi fengu svo utanskóla stúdentspróf frá MR vorið 1927. Um haustið sama ár fékk skólinn svo leyfi til þess að útskrifa stúdenta sjálfur og gerðist það í fyrsta skiptið 1928. 1930 var skólinn gerður að fullkomnum menntaskóla og tók hann sér þá núverandi nafn. Síðan 1930 hefur skólinn stækkað mjög við sig í nemendafjölda og húsakosti og nú stunda þar um 700 manns nám og skólinn útskrifar rúmlega 100 stúdenta á ári hverju.
[breyta] Námsframboð
Menntaskólinn á Akureyri er hefðbundinn bóknámsskóli sem býður upp á fjögurra ára nám til stúdentsprófs. Skólinn er bekkjaskóli með áfangakerfi og sá eini á landinu sem fylgir þeirri skipan, í því felst að á hverri önn tekur hver bekkur fyrirfram ákveðna áfanga. Einnig gefst einstaklingum nokkur kostur á valáföngum innan hverrar námsbrautar.
Námsbrautirnar eru:
- Félagsfræðibraut
- Málabraut
- Náttúrufræðibraut
- Eðlisfræðilína
- Náttúrufræðilína
- Listnámsbraut
Í fyrsta bekk taka allir sömu áfangana og velja síðan námsbraut að því loknu. Náttúrufræðibraut skiptist í náttúrufræði- og eðlisfræðilínu og auk þess gefst kostur á að velja listnámsbraut (tónlistarkjörsvið). Stúdentsprófið 140 einingar sem skiptast á milli kjarna, kjörsviðs og frjáls vals.
[breyta] Félagslíf
Menntaskólinn á Akureyri er rótgróin stofnun þar sem nokkuð er um gamlar hefðir og má til dæmis nefna þegar nemendur safnast á ganga Gamla skóla til þess að reyna að syngja fyrir fríi. Árshátið skólans hefur löngu fest sig í sessi og er haldin á ári hverju í kringum fullveldisdaginn 1. desember. Sú hátíð er vímulaus eins og allar samkomur á vegum skólans og skólafélagsins.
Skólafélagið Huginn og sér um skipulag félagslífsins, gefur út skólablaðið Muninn og stendur fyrir viðburðum á borð við Ratatosk sem eru opnir dagar þar sem brugðið er útaf hefðbundinni stundaskrá skólans og boðið upp á ýmiskonar fyrirlestra og námskeið. Undir skólafélaginu starfa svo fjölmörg félög eins og leikfélag, tónlistarfélag, íþróttafélag, kór, ljósmynda- og myndbandafélag og svo framvegis. Algengt er að nöfn félaganna séu skammstöfuð og enda þau þá ávallt á MA, þar má nefna HÍMA og VÍMA sem eru stjórnmálafélög skólans (Hægri menn í MA og Vinstri menn í MA).
Eitt af því sem einkennir mjög andrúmsloftið í skólanum er það að nemendur hans koma allstaðar af landinu en stór heimavist er við skólann, um helmingur nemenda skólans kemur ekki frá Akureyri.
[breyta] Hús skólans
Skólinn á nú mest allt landið milli Eyrarlandsvegar, Hrafnagilsstrætis, Þórunnarstrætis og Lystigarðs og hefur reist nokkur hús þar.
[breyta] Gamli skóli
Gamli skóli er elsta hús skólans, hann var byggður sumarið 1904. Framkvæmdir hófust í maí og hófst kennsla í húsinu í október sama ár en þá var húsið að mestu tilbúið. Á efri hæð hússins er að finna Sal sem sem var samkomusalur skólans allt fram til 1968. Í dag hýsir gamli skóli kennarastofu og skrifstofur stjórnenda skólans auk þess sem kennsla í erlendum tungumálum fer að mestu fram þar.
[breyta] Fjósið
Fjósið er íþróttahús skólans, og hefur það nafn því þar var eitt sinn hýst fjós, þar er lítill íþróttasalur auk áfastrar geymslu sem var innréttað sem kraftlyftingarsalur að hausti 2003. Byggingin sjálf var reist 1905.
[breyta] Möðruvellir
Möðruvellir voru teknir í notkun 1968 og er húsið nefnt eftir Möðruvöllum í Hörgárdal þar sem fyrirrennari Menntaskólans á Akureyri var eitt sinn. Húsið hefur frá upphafi verið notað að mestu til raungreinakennslu, í kjallara þess var aðalsamkomusalur skólans á árunum 1968-1996. Í kjallaranum eru nú tölvuver og aðstaða nemendafélagsins.
[breyta] Heimavist
Framkvæmdir við núverandi heimavist MA hófust 1946 en verkið gekk hægt og lauk því ekki fyrr en um 1970. Fram að því hafði heimavist skólans verið í Gamla skóla. Bókasafn skólans var lengi hýst í húsi heimavistarinnar.
[breyta] Hólar
Hólar voru teknir í notkun 1996 og eru nefndir eftir Hólum í Hjaltadal. Byggingin liggur á milli Gamla skóla og Möðruvalla og tengist þeim með göngum þannig að nú er innangengt milli allra kennsluhúsa skólans. Á Hólum er aðalinngangur skólans, bókasafnið og stór samkomusalur sem kallaður er Kvosin. Þar er einnig vinnuaðstaða fyrir kennara og nokkrar kennslustofur sem eru mest notaðar fyrir kennslu í félagsvísindagreinum, íslensku og sögu.
[breyta] Nemendagarðar
Nýir nemendagarðar voru teknir í notkun 2003 austan við eldri heimavist. Í húsinu eru 118 smáíbúðir sem ætlaðar eru bæði nemendum við MA sem og VMA.
[breyta] Þekktir MA-ingar
- Adolf Ingi Erlingsson íþróttafréttamaður
- Anna Katrín Guðbrandsdóttir Idol-stjarna
- Arnar Björnsson íþróttafréttamaður
- Eva Ásrún Albertsdóttir söngkona
- Erna Hildur Gunnarsdóttir söngkona
- Flosi Ólafsson leikari
- Heimir Steinsson prestur og fyrrv. útvarpsstjóri
- Jón Jósep Snæbjörnsson söngvari
- Kári Jónsson tónlistarmaður
- Kristján Eldjárn fyrrv. forseti Íslands
- Steinunn Vala Sigfúsdóttir
- Vilhelm Anton Jónsson tónlistar- og sjónvarpsmaður
- Vilhjálmur Einarsson silfurverðlaunahafi í þrístökki á ÓL 1956
- Þorvaldur Þorsteinsson rithöfundur
[breyta] Stjórnmálamenn
- Björn Dagbjartsson fyrrv. Alþingismaður og sendiherra
- Guðlaugur Þór Þórðarson Alþingismaður
- Halldór Blöndal Alþingismaður, fyrrv. ráðherra og forseti Alþingis
- sr.Hjálmar Jónsson dómkirkjuprestur og fyrrv. Alþingismaður
- Hjörleifur Guttormsson fyrrv. Alþingismaður og ráðherra
- Ingvar Gíslason fyrrv. Alþingismaður og ráðherra
- Jón Sigurðsson fyrrv. Alþingismaður og ráðherra
- Jóhann Hafstein fyrrv. forsætisráðherra
- Júlíus Sólnes fyrrv. Alþingismaður og ráðherra
- Magnús Jónsson fyrrv. Alþingismaður og ráðherra
- Ólafur Björnsson fyrrv. Alþingismaður og hagfræðiprófessor
- Ólafur G. Einarsson fyrrv. forseti Alþingis og ráðherra
- Ólafur Jóhannesson fyrrv. forsætisráðherra
- Páll Pétursson fyrrv. Alþingismaður og ráðherra
- Sighvatur Björgvinsson fyrrv. Alþingismaður og ráðherra
- Sigríður Anna Þórðardóttir fyrrv. umhverfisráðherra
- Steingrímur J. Sigfússon Alþingismaður
- Steinþór Gestsson fyrrv. Alþingismaður og meðlimur MA-kvartettsins
- Svanhildur Hólm Valsdóttir fjölmiðlamaður
- Sverrir Hermannsson fyrrv. Alþingismaður
- Tómas Ingi Olrich sendiherra
- Vilhjálmur Egilsson fyrrv. Alþingismaður
[breyta] Tenglar
- Vefsíða Menntaskólans á Akureyri
- Vefútgáfa Munins, skólablaðs Menntaskólans á Akureyri
- Félög í Menntaskólanum á Akureyri
Fyrri: Menntaskólinn við Sund |
|
Næsti: Menntaskólinn í Reykjavík |
|||
Fyrri: Borgarholtsskóli |
|
Næsti: Enginn |
![](../../../upload/shared/thumb/e/e1/Lasvard.png/14px-Lasvard.png)