Antropologie
From Wikipedia
Antropologie es un social scientie quel studia li homes sub tot lor aspectes, social, cultural e fisical. Ti ci discipline se aplica precipue pri li studie de societés nonoccidental o pri etnic minorités occidental, etc. (On parla pri etnologie por li studie de specific populationes e pri antropologie por li general studie del homan specie.)
On distinte pluri traditiones in antropologie, de queles li max important es li francesi sociologic scole (Émile Durkheim, Marcel Mauss, Claude Lévi-Strauss), britanic social antropologie (J.G. Frazer, Bronislaw Malinowski, A.R. Radcliffe-Brown, E.E. Evans-Pritchard) e american cultural antropologie (L.H. Morgan, Franz Boas, Marvin Harris, Clifford Geertz).
Li francesi modelle privilegia precipue li aspectes simbolic e social del studie del home e fa de etnologie un subdiscipline de sociologie, negligente, secun alcun persones, li aspectes material e fisical del home.
Li anglosaxonic modelle es, por su parte, basat sur multidisciplinaritá e divide antropologie traditionalmen ad-in quar subdisciplines :
- fisical antropologie, quel studia li evolution de fisic caracteristicums del home, li genetica de populationes e li biologic bases del conduida del home e altri primates;
- cultural antropologie, quel se interessa p.ex. pri li studie de politica e de organisation social in families e plu grand gruppes, e pri li moralitá, religion e altri simbolic aspectes de homan societés;
- linguistic antropologie, quel studia li social utilisation de lingue, e li relationes inter lingue e cultura;
- archeologie, quel studia homan societés del passate per lor artifactes. Archeologie es normalmen tractat quam un distint (ma relatet) discipline in altri partes del munde.
