Vetere Testamento
De Wikipedia, le encyclopedia libere
Le Vetere Testamento constitue le prime parte del Biblia christian. Illo contine circa 39 libros, comenciante con le libro del Genesis (excludite le libros Deuterocanonic includite in le Biblia del Ecclesia catholic roman. Illos usualmente se classifica in le categorias legal, historic, poetic e prophetic. Tote ille libros esseva scribite ante le nascentia de Jesus Christo. Le texto del Vetule Testamento usate per le christianos primordial esseva le Septuaginta, un traduction grec que esseva amplemente considerate autorisate per le judeos in le prime seculo.
Le Vetule Testamento christian sin le libros deuterocanonic corresponde al Scripturas Judaic (Tanach) in uso hodie, excepte que ambe versiones ha un ordination legiermente differente de libros. (Ben que le judeos faceva uso del Septuaginta usque a alcun tempore ante le emergentia del Christianismo, illos nunquam considerava le parte deuterocanonic de lor canone.) Le christianos denomina iste gruppo de libros "Vetule Testamento", a causa de un credentia (inseniate in le Epistola al hebreos) que il ha un nove pacto o testamento inter Deo e le humanitate, post le advento de Jesus. Le judeos mesme non accepta le Nove Testamento o le characterisation del Tanach como le Vetule Testamento (ben que multe judeos accepta Jesus como un figura historic). Il ha alcun controversia inter eruditos protestante super le question de si le Nove Testamento se applica al populo judee, mais il ha multe pauc controversia super su applicabilitate al gentiles. Similarmente, le grado in que le Vetule Testamento e su leges se applica al christianos es un puncto controverse.
Le texto del Nove Testamento totevia contine multe referentias al Vetule Testamento, specialmente in relation al realisation de prophetias concernente le messia promittite, que le christianos crede esser Jesus Christo. In le vision theologic christian, iste expectation, le realisation presente e le realisation eschatologic del regno divin e eterne sub le autoritate de Christo es le filo que se extende trans ambe Testamentos.
