Orientaj Pireneoj
El Vikipedio
Geografio > Eŭropo > Francio > Langvedoko-Rusiljono > Pyrénées-Orientales < Francaj departementoj
Orientaj Pireneoj (Pyrénées Orientales) [pirene orjãtal] estas unu el la kvin departementoj de la regiono Langvedoko-Rusiljono. Ĝi plejparte sekvas la malnovajn limojn de la provinco Rusiljono (france : Roussillon, katalune : Rosselló, kastilie : Rosellón), kaj estas la sola departemento de tiu regiono kie oni parolas la la katalunan lingvon en aparta dialekto : la Nord-kataluna (vidu artikolon en la kataluna Vikipedio), kune kun la franca kaj la okcitana. Rusiljono estas la norda parto de Katalunio (Nord-Katalunio).
Ĝi etendiĝas sur 4 087 km² kaj havas 391 990 loĝantojn. La ĉefurbo estas Perpignan [perpinjã], katalune Perpinyà [parpinja].
Situante ĉe la Mediteranea marbordo, tiu ĉi departemento posedas ankaŭ sur sia teritorio parton de la Pireneoj. Pro tio ĝi ĝuas grandegan diversecon da pejzaĝoj.
La ekonomia vivo konsistas el agrikulturo (kultivado de legomoj kaj fruktoj, vinberejoj, bredado en la montaraj zonoj), fiŝkaptado en la Mediteranea maro, sed estas malmulte da industrioj.
Turismo ludas apartan rolon dank'al la bela marbordo (longaj plaĝoj, fiŝkaptistaj vilaĝetoj kiel Collioure, plezurhavenoj en Port-Barcarès aŭ Saint-Cyprien), la montaro kun ĉiaj sportoj (ekskursado, akvosportoj, skiado, ...), ban-urboj inter la plej famaj de Francio (Amélie-les-Bains-Palalda, Le Boulou, Vernet-les-Bains).