Hérault

El Vikipedio

Geografio > Eŭropo > Francio > Langvedoko-Rusiljono > Hérault < Francaj departementoj

Hérault (34)

Informoj
Regiono :	Langvedoko-Rusiljono
Prefektejo :	Montpellier
Subprefektejoj :	Béziers Lodève
Loĝantaro - Suma (1999) - Loĝdenso	896 441 loĝantoj 147 loĝantoj/km²
Areo	6 101 km²
Arondismentoj	3
Kantonoj	49
Komunumoj	343
Prezidento de la Ĝenerala Konsilio	André Vezinhet
Situo en Francio

Hérault [ero] (aŭ okcitanlingve Erau [eraŭ]) estas unu el la kvin departementoj de la sudfranca regiono Langvedoko-Rusiljono. Ĝia surfaco estas 6 224 km², kaj ĝi havas 896 150 loĝantojn. Ĝi posedas 87 km da marbordo ĉe la Mediteranea maro kaj plurajn lagunojn laŭlonge de la marbordo. La geografia aspekto de Hérault konsistas el du tipoj da pejzaĝoj : la ebenaĵo de Langvedoko apud la maro, kaj la montoj de Cévennes en la norda kaj okcidenta parto. Ĉe la montaro troviĝas ankaŭ altebenaĵoj aridaj.

La ĉefurbo estas Montpellier, kiu estas ankaŭ ĉefurbo de la tuta regiono Langvedoko-Rusiljono. Ĝi estas samtempe malnova urbo riĉa je monumentoj, kaj moderna kaj dinamisma urbo (universitatoj, esplorlaboratorioj...). Alia granda urbo estas Béziers. La departemento tute enhavas 343 komunumojn.

En la larĝa ebenaĵo koncentriĝas la agrikulturo (vinoj, fruktoj), kaj kompreneble fiŝkaptado en la maro. Sète estas ankaŭ granda komerca haveno.

La marbordo allogas milionoj da turistoj dank'al siaj longaj kaj fajnsablaj plaĝoj kaj plezurhavenoj (La Grande Motte, Palavas-les-Flots, Agde). En la interna parto de Hérault tamen ne mankas la allogaĵoj : natura parko de Alta Langvedoko, multnombraj mezepokaj vilaĝoj, monaĥejoj, kasteloj, grotoj, ban-urboj, grandiozaj naturaj pejzaĝoj de la montaro Cévennes.