Steve Jobs
Van Wikipedia
- Dit artikel is gesjreve in 't Valkebergs. 't Weurt gewaardeerd óm in dit artikel woe meugelik 't Valkebergs aan te hawte.
Steven Paul Jobs (24 februari 1955) ies 'ne Amerikaanse software-óntwiekkelaer. Hae ies bekènd doordat hae same mèt Steve Wozniak Apple Computer Inc. opgeriech haet.
[bewirk] Leve
Jobs woort in 1955 gebore in Green Bay in de sjtaat Wisconsin es Steven Paulis. Sjnel nao zien geboorte woort hae geadopteerd door de Californische familie Jobs. Ziene ónbekènde biologische pap sjtamde oet Egypte. In 1991 trouwde Jobs mèt Laurene Powell; same höbbe zie 3 kinger. Wiejer haet Jobs nog ein dochter oet ein ièrder relatie, Lisa. Nao häör ies de Apple-computer mèt dezelfde naam geneump.
In 1974 góng Jobs wèrke veur de firma Atari, woa hae same mèt Wozniak computersjpeller ontworp. Same mèt Wozniak en Wayne sjtiechde Jobs in 1976 't bedrief Apple Computer, in de graasj van de familie Jobs in Palo Alto. 't Ièrsjte produk, de Apple I ies nog gei groat succes, meh e jaor later begoes me mèt de succesvol Apple II-serie. Dit waor de ièrsjte computer dae ouch in klein bedriever in de Vereinigde Sjtaote gebruuk woort. Jobs haet d'r ouch veur gezörg dat de ièrsj sjlech loupende Apple Lisa-serie en de Macintosh de grafische interface van Xerox PARC euvernaome.
In 1985 góng Jobs weg bie Apple en begoes hae 't bedrief NeXT, dat ziech bezighèlt mèt 't óntwiekkele van innovatief hardware en software. Wiejer góng Jobs ouch bie Pixar wèrke. In 1996 koch Apple NeXT veur 400 miljoan dollar. Vanaaf 1997 góng hae in de raod van besjtuur en saer september van dat jaor woort hae algemein directeur (CEO of Chief Executive Officer) ad interim. 't Door NeXT óntwiekkelde besjturingssysteem NeXTSTEP woort wiejer óntwiekkeld tot Mac OS X. Jobs haet deveur gezörg dat Apple sjterk truukkaom mèt produkte wie de iMac, iPod en iTunes, veurbeelde van zoagenaamde "digital lifestyle". Hiedoor kreeg hae de bienaam "iCEO".
Saer januari 2000 ies Steve Jobs officieel algemein directeur (CEO) van Apple, meh hae kriet nog mer eine dollar loan per jaor. De wins die hae kriet maakde häöm èvvel volges de San Francisco Business Times tot "Most Overpaid CEO". Me sjat zie vermoge op 3 miljard dollar.
