Jimmy Wales
Van Wikipedia
- Dit artikel is gesjreve in 't Valkebergs. 't Weurt gewaardeerd óm in dit artikel woe meugelik 't Valkebergs aan te hawte.
Jimmy Donal "Jimbo" Wales (7 augustus 1966) ies 'ne Amerikaanse internèt-óndernummer. Hae ies bekènd gewore es opriechter van Wikipedia en es veurzietter van de Wikimedia Foundation. Allewiel (2006) ies hae besjtuurslid van dees organisatie. Wales ies ouch groataandeilhouwer en directeur van 't internètbedrief Bomis.
[bewirk] Leve
Wales woort gebore in Huntsville (Alabama), es zoon van Jim en Doris Wales. Hae góng nao sjoal aan de "House of Learning", 'n klein privésjoal die 't eigendom waor van zien mam en zien oma. In 1983 haolde hae zien diploma aan de Randolph School. Hae góng economie sjtudere aan de Auburn University, woa hae zien bachelordiploma haolde, en aan de University of Alabama, woa hae zien masterdiploma haolde. In 1994 woort Wales toegelaote tot 't promotietrajek aan Indiana University, meh hae besjliesde um in Chicago te goon wèrke es optiehandelaer. In 1998 verhuusde hae mèt zien vrouw Christine nao Californië, woa hae 'n internètbedrief begoes, 't zeukportaol Bomis.
Wales loos es kind al alles wat los en vas zoot, veural de 22-deilige Worldbook-encyclopedie van zien ouwersj. Hae ies 'ne bewonderaer van de objectivistische filosofie van Ayn Rand, en in de jaore neugetig beheerde hae ein mailinglies mèt de naam "Moderated Discussion of Objectivist Philosophy". Van 1999 tot 2001 houw Wales de leiing euver 't Nupedia-projek, woa 'r mèt filosoof Larry Sanger aan wèrkde. Vervolges begoes hae ein online encyclopedie onder de GNU Vrie Documentatie Licentie volgens 't wiki-princiep, en in 2003 riechde hae de Wikimedia-sjtiechting op. Daoneve ies 'r nog ummer directeur van Bomis Incorporated.
Wales woont mèt zien vrouw en hun dochter Kira (2001) in Saint Petersburg, Florida.
