Nicolas Birtz
Vu Wikipedia, der fräier Enzyklopedie.
Den Nicolas Birtz oder Birtze Néckel wéi en zu Diddeleng genannt gouf, gebuer de 17. Mäerz 1922 zu Esch-Uelzecht a gestuerwen den 20. Mäerz 2006, war e lëtzebuergeschen LSAP Politiker a Sportsmann.
No sengem Studium am Koléisch huet hien zu Diddeleng op der ARBED als Beamte geschafft.
Vu Jonktem un huet hie sech fir Foussball interesséiert an huet zu Diddeleng op der Stade gespillt. Hie war och 1948 als Foussballist op den Olympesche Spiller zu London derbäi. Hie war och ee vun den Aktiviste fir déi Diddelenger Foussballveräiner ze fusionnéieren a gouf Éirepresident vum F91.
Am Zweete Weltkrich war hien an der Resistenz am Alweraje-Grup an ass och duerfir vun der Gestapo fir d'éischt op Hinzert an duerno op Natzweiler verschleeft ginn, vum August 1942 bis den 8. Mee 1945. Zu Natzweiler huet hien, wéi och aner Lëtzebuerger déi do ware, musse Steng klappe fir den Tunnel Sainte-Marie.
1951 ass hien an de POSL agetrueden a war och dat Joer am Oktober fir d'éischt als Kandidat bei de Gemengewalen derbäi. Hie gouf och gewielt a war duerno vum 1. Januar 1952 bis den 31. Dezember 1963 Gemengerot, duerno, vum 1. Januar 1964 bis den 21. Mee 1973, Schäffen. Den 22. Mee 1973 gouf hie Buergermeeschter vun Diddeleng an ass dat bliwwe bis de 24. Dezember 1984.
De 14. Februar 1985 gouf de Nicolas Birtz Éirebuergermeeschter vun Diddeleng.
Bei de Chamberwale vun 1974 gouf hien och gewielt a war Deputéierten vu 1974 bis 1979 an duerno vun 1980 bis 1989.
