Jean Spautz
Vu Wikipedia, der fräier Enzyklopedie.
De Jean Spautz (*9. September 1930 zu Schëffleng) ass e lëtzebuergesche Gewerkschaftler a Politiker.
De Jean Spautz war Aarbechter um Walzwierk op der Arbed. Hien huet sech fréi politesch engagéiert. Vun 1954 bis 1958 war hie President vun der JOC a vun 1960 bis 1966 President vun der Jugendsectioun vun der CSV. Vun dëser Partei war hien och vun 1982 bis 1990 President. President vum LCGB war hie vun 1967 bis 1980.
De Jean Spautz war tëscht 1964 an 1980 Member vum Schëfflenger Gemengerot an zousätzlech tëscht 1975 an 1980 Buergermeeschter.
Vun 1959 bis 1980 war hien Deputéierten an der Chamber. 1979-1980 war en hire Vizepresident a vun 1995 bis 2004 hire President.
Vun 1980 bis 1989 war hien Inneminister, Minister fir Famill, Soziale Wunnéngsbau a sozial Solidaritéit an der Regierung Werner-Thorn-Flesch a Santer-Poos I. Vun 1989 bis 1995 war hien Inneminister a Minister fir Wunnéngsbau an Urbanismus an der Regierung Santer-Poos II an III.
Vun 1979-1980, an dann nees zënter 2004, ass hie Deputéierte vum Europäesche Parlament. Hie war och Member vun der Assemblée consultatice vum Europarot a vun der Westeuropäescher Unioun (1968-1979).
