Kanslari Þýskalands

Úr Wikipediu, frjálsa alfræðiritinu

Angela Merkel, Kanslari Þýskalands síðan 22. nóvember 2005

Kanslari Þýskalands (þýska: Bundeskanzler (1867-1871, 1949-), Reichskanzler (1871-1949)) er formaður ríkisstjórnar Þýskalands og því æðsti maður framkvæmdavalds sambandsríkisins. Hann velur sér ráðherra og ákvarðar stefnu ríkisstjórnarinnar. Kanslarinn er í raun valdamesti stjórnmálamaður landsins en formlega er hann þriðji maður í virðingarröðinni á eftir forseta og þingforseta. Staða hans er sambærileg stöðu forsætisráðherra á Íslandi. Kanslarinn er kjörinn af sambandsþinginu til eins kjörtímabils (4 ára) í senn og hefur sambandsþingið eitt vald til að setja hann af fyrir lok kjörtímabilsins með vantraustsyfirlýsingu.

Núverandi kanslari er Angela Merkel og er hún fyrsta konan sem gegnir embættinu. Samkvæmt þýskri málvenju bætist því viðskeytið -in við þýska titilinn Bundeskanzler og er Merkel því titluð Bundeskanzlerin.

Kanslarar hafa farið fyrir ríkisstjórnum Þýskalands frá 1867, en titillinn á rætur að rekja til embættismanna í hinu heilaga rómverska ríki á miðöldum.