Max Planck
De Wikipedia, le encyclopedia libere
Max Karl Ernst Ludwig Planck (nascite le 23 de april 1858 - morite le 4 de octobre 1947) esseva un physico german. On le considera como le inventor del theoria quantic.
Nascite in Kiel, Planck comenciava su studios de Physica in le Universitate de München in 1874 e se graduava in 1879 in le citate de Berlin. Ille reveniva a München in 1880 pro exercer como professor universitari e in 1885 ille mutava de casa a Kiel. Illac ille se sposava con Marie Merck in 1886. In 1889, ille retornava a Berlin, ubi desde 1892 ille esseva le director del cathedra de Physica theoric.
In 1899 ille discoperiva un constante fundamental, le denominate constante de Planck, que es, per exemplo, usate pro calcular le energia de un photon. Iste mesme anno ille describeva su propie gruppo de unitates de mesura basate in le constantes physic fundamental. Un anno postea ille discoperiva le lege de radiation del calor, denominate lege de Planck, que explica le spectro de emission de un corpore nigre. Iste lege deveniva un del bases del theoria quantic que surgeva alcun annos plus tarde con le collaboration de Albert Einstein e de Niels Bohr.
Desde 1905 usque a 1909, Planck esseva le director del Deutsche Physikalische Gesellschaft (Societate German de Physica). Su sposa moriva in 1909, e un anno postea ille se remaritava con Marga von Hoesslin. In 1913, ille esseva le capite del universitate de Berlin. In 1918 ille ha recipite le Premio Nobel de Physica pro le creation del mechanica quantic. Desde 1930 usque a 1937, Planck esseva capite del Kaiser-Wilhelm-Gesellschaft zur Förderung der Wissenschaften (KWG, Societate del Imperator Guilhelmo pro le avantiamento del scientia).
Durante le Secunde Guerra Mundial, Planck ha tentate convincer Hitler de perdonar le scientistas judee. Erwin, le filio de Planck, esseva executate pro alte traition le 20 de julio 1944, pro le supponite collaboration in le tentativa de assassination contra Hitler. Post le morte de Max Planck le 4 de octobre 1947 in Göttingen, le KWG ha essite renominate a Max-Planck-Gesellschaft zur Förderung der Wissenschaften (MPG, Societate de Planck pro le disveloppamento del scientia).
